2026 jylǵa dollar baǵamy 535 teńge tóńireginde bolady degen boljam jariialanǵan soń, ulttyq valiýtanyń bolashaǵy taǵy da qyzý talqyǵa tústi. Bul máselege Qazaq Expert Club sarapshysy, qarjyger Venera Janalina pikir bildirdi, dep habarlaidy Dalanews.kz.
Onyń aitýynsha, qazirgi jaǵdaida teńgeniń kúrt qunsyzdanýyna alyp keletin aiqyn ekonomikalyq alǵysharttar joq. Baǵam belgili bir deńgeide qubylýy múmkin, táýekelder teńgeniń birshama álsireýin kórsetkenimen, bul naryqqa tán qalypty qozǵalystar sheńberinde ótedi. Iaǵni valiýtalyq quldyraý kútilmeidi.
"Teńgeniń álsireýine áser etýi múmkin negizgi syrtqy faktorlardyń biri – Brent markaly munai baǵasy. Boljam boiynsha, 2026 jyly munaidyń ortasha baǵasy barreline shamamen 62–64 dollar bolýy yqtimal. Bul kórsetkish 2025 jylǵy ortasha deńgeiden (68–69 dollar) tómen, sáikesinshe eksporttyq tabys pen ulttyq valiýtaǵa qysym túsirýi múmkin", - deidi ol.
Ishki faktorlar qatarynda biýdjet saiasaty, import kóleminiń artýy jáne infliatsiialyq kútýler atalady. Ulttyq bank pen naryq qatysýshylarynyń baǵalaýynsha, biyl infliatsiia 9,5–11% aralyǵynda saqtalýy múmkin. Bul halyqtyń satyp alý qabiletine jáne valiýtalyq kútýlerge áser etpei qoimaidy.
"Sonymen birge teńgeni qoldaityn mańyzdy tetik – qatań aqsha-kredit saiasaty. Bazalyq mólsherlemeniń 18% deńgeiinde saqtalýy teńgelik aktivterdiń tartymdylyǵyn arttyryp, kapital aǵynyn kúsheitedi. Alaida infliatsiialyq qysym kúsheiip, ishki suranys ósse, bul faktordyń áseri álsireýi múmkin", - deidi sarapshy.
Sarapshy Qazaqstanda valiýtalyq turaqtylyqty saqtaityn mańyzdy qorlar bar ekenin atap ótti. Eldiń altyn-valiýta rezervteri aitarlyqtai kólemde, al Ulttyq qor aktivteri syrtqy kúizelisterge qarsy qosymsha qorǵanys qyzmetin atqarady.
