2026 jyldan bastap Qazaqstanda birqatar meditsinalyq qyzmet túrleriniń tarifi ósedi. Densaýlyq saqtaý ministrligi muny mindetti áleýmettik meditsinalyq saqtandyrý (MÁMS) týraly zańǵa engizilgen ózgeristermen bailanystyryp otyr, dep habarlaidy Dalanews.kz.
Ministrlik taratqan málimetke sáikes, MÁMS júiesindegi qosymsha qarajat meditsinanyń basym baǵyttaryndaǵy tarifterdi kóterýge, sondai-aq onkologiia men onkogematologiia qyzmetin, jedel járdem jáne alǵashqy meditsinalyq-sanitarlyq kómekti qarjylandyrýǵa jumsalmaq.
«Kelesi jyldan bastap infektsiialyq aýrýlar, kardiologiia, nevrologiia, nefrologiia, gastroenterologiia, travmatologiia, endokrinologiia, abdominaldyq hirýrgiia baǵyttary boiynsha tarifter qaita qaralady. Bul maqsatqa qosymsha 90 milliard teńgeden astam qarajat bólý josparlanǵan», – deidi ministrlik.
Vedomstvo ókilderiniń aitýynsha, bul sheshim statsionarlyq sektordaǵy 2020 jyldan beri ózgerissiz, shyǵynǵa ushyratyp kelgen tarifterdi qaita jańartýǵa múmkindik beredi.
Aita keteiik, buǵan deiin habarlaǵanymyzdai, Qazaqstanda emdelý quny sońǵy eki jylda aitarlyqtai qymbattady. 2025 jyldyń birinshi toqsanynda halyqtyń meditsinalyq qyzmetke jumsaǵan shyǵyndary úshten birge artqan bolatyn. Sarapshylar meditsinalyq tarifterdiń ósýin azamattardyń densaýlyq saqtaý salasyna degen qarjylyq júktemesin ulǵaityp, qoljetimdi meditsinalyq kómektiń aiasyn taryltýy múmkin dep boljap otyr.
