2026 جىلدان باستاپ قازاقستاندا ءبىرقاتار مەديسينالىق قىزمەت تۇرلەرىنىڭ ءتاريفى وسەدى. دەنساۋلىق ساقتاۋ مينيسترلىگى مۇنى مىندەتتى الەۋمەتتىك مەديسينالىق ساقتاندىرۋ (ءمامس) تۋرالى زاڭعا ەنگىزىلگەن وزگەرىستەرمەن بايلانىستىرىپ وتىر، دەپ حابارلايدى Dalanews.kz.
مينيسترلىك تاراتقان مالىمەتكە سايكەس، ءمامس جۇيەسىندەگى قوسىمشا قاراجات مەديسينانىڭ باسىم باعىتتارىنداعى تاريفتەردى كوتەرۋگە، سونداي-اق ونكولوگيا مەن ونكوگەماتولوگيا قىزمەتىن، جەدەل جاردەم جانە العاشقى مەديسينالىق-سانيتارلىق كومەكتى قارجىلاندىرۋعا جۇمسالماق.
«كەلەسى جىلدان باستاپ ينفەكسيالىق اۋرۋلار، كارديولوگيا، نيەۆرولوگيا، نەفرولوگيا، گاستروەنتەرولوگيا، تراۆماتولوگيا، ەندوكرينولوگيا، ابدومينالدىق حيرۋرگيا باعىتتارى بويىنشا تاريفتەر قايتا قارالادى. بۇل ماقساتقا قوسىمشا 90 ميلليارد تەڭگەدەن استام قاراجات ءبولۋ جوسپارلانعان»، – دەيدى مينيسترلىك.
ۆەدومستۆو وكىلدەرىنىڭ ايتۋىنشا، بۇل شەشىم ستاسيونارلىق سەكتورداعى 2020 جىلدان بەرى وزگەرىسسىز، شىعىنعا ۇشىراتىپ كەلگەن تاريفتەردى قايتا جاڭارتۋعا مۇمكىندىك بەرەدى.
ايتا كەتەيىك، بۇعان دەيىن حابارلاعانىمىزداي، قازاقستاندا ەمدەلۋ قۇنى سوڭعى ەكى جىلدا ايتارلىقتاي قىمباتتادى. 2025 جىلدىڭ ءبىرىنشى توقسانىندا حالىقتىڭ مەديسينالىق قىزمەتكە جۇمساعان شىعىندارى ۇشتەن بىرگە ارتقان بولاتىن. ساراپشىلار مەديسينالىق تاريفتەردىڭ ءوسۋىن ازاماتتاردىڭ دەنساۋلىق ساقتاۋ سالاسىنا دەگەن قارجىلىق جۇكتەمەسىن ۇلعايتىپ، قولجەتىمدى مەديسينالىق كومەكتىڭ اياسىن تارىلتۋى مۇمكىن دەپ بولجاپ وتىر.
