2025 – 2027 jyldarǵa arnalǵan respýblikalyq biýdjet týraly zańda 2025 jylǵy 1 qańtardan bastap memlekettik járdemaqylar men bazalyq zeinetaqy tólemderiniń barlyq túrin QR Ulttyq banki aiqyndaityn infliatsiianyń boljamdy deńgeiine sáikes 6,5 %-ǵa, yntymaqty zeinetaqyny – 8,5 %-ǵa, iaǵni infliatsiia deńgeiinen 2%-ǵa oza otyryp arttyrý kózdelgen, dep jazady Dalanews.kz.
Budan bólek Memleket basshysynyń tapsyrmasy boiynsha 2023 jyldan bastap bes jyl ishinde eń tómen bazalyq zeinetaqyny eń tómen kúnkóris deńgeiiniń 70 %-na deiin, eń joǵarysy – 120 %-ǵa deiin jyl saiyn kezeń-kezeńimen arttyrý júzege asyrylady, dep habarlaidy Eńbek jáne halyqty áleýmettik qorǵaý ministrligi.
"Máselen, 2025 jylǵy 1 qańtardan bastap bazalyq zeinetaqynyń eń tómen mólsheri eń tómen kúnkóris deńgeiiniń 65%-nan 70%-ǵa deiin ulǵaitylady, bul 32 360 teńgeni qurap, onyń eń joǵary mólsheri eń tómen kúnkóris deńgeiinen 105-ten 110%-ǵa deiin arttyrylyp, 50 851 teńgeni quraidy", delingen resmi habarlamada.
Bul rette ministrlik 2019 jyly zeinetke shyqqan 69 jastaǵy zeinetkerdi mysalǵa alyp, esep-qisabyn usynady:
"Mysaly, 2019 jyly zeinetkerlikke shyqqan 69 jastaǵy zeinetkerdiń 2024 jyly biýdjetten tólenetin zeinetaqy mólsheri 156 856 teńgeni qurady, onyń ishinde bazalyq zeinetaqy tólemi – 45 578 teńge, yntymaqty zeinetaqy – 111 278 teńge. 2025 jylǵy 1 qańtardan bastap ósimdi eskere otyryp, osy zeinetker úshin zeinetaqynyń jalpy somasy 171 588 teńgege deiin ulǵaiady, onyń ishinde bazalyq zeinetaqy – 50 851 teńgeni, yntymaqty zeinetaqy – 120 737 teńgeni quraidy. Atalǵan somalarǵa BJZQ-daǵy tólemder kirmeitinin atap ótý mańyzdy".
2025 jylǵy 1 qańtardan bastap memlekettik járdemaqylardyń ulǵaiýynyń birneshe úlgisi:
- 1, 2, 3 bala týǵanda beriletin járdemaqy 140 296 teńgeden 149 416 teńgege deiin, 4 jáne odan da kóp bala týǵanda beriletin járdemaqy – 232 596 teńgeden 247 716 teńgege deiin ulǵaiatyn bolady;
- mólsheri balalar sanyna bailanysty beriletin kópbalaly otbasylarǵa arnalǵan járdemaqy 4 balasy bar otbasylar úshin 59 183 teńgeden 63 030 teńgege deiin, 10 balasy bar otbasylar úshin – 147 680 teńgeden 157 280 teńgege deiin ulǵaiady;
- I top múgedektigi bar adamdarǵa arnalǵan járdemaqy 95 496 teńgeden 101 702 teńgege deiin, II top – 76 397 teńgeden 81 362 teńgege deiin, III top – 52 089 teńgeden 55 474 teńgege deiin ulǵaitylady.
Sondai-aq, Memlekettik áleýmettik saqtandyrý qorynan (budan ári – MÁSQ) asyraýshysynan aiyrylý jáne eńbekke qabilettiliginen aiyrylý boiynsha tólemder 6,5 %-ǵa artady. Atalǵan tólemder mindetti áleýmettik saqtandyrý júiesine qatysýshylarǵa biýdjetten beriletin memlekettik járdemaqylarǵa qosymsha júzege asyrylady.
Tólemderdiń mólsheri jeke sanattarǵa jáne kelesilerge bailanysty bolady:
- sońǵy 2 jylda MÁSQ-ǵa áleýmettik aýdarymdar júrgizilgen ortasha ailyq tabys,
- eńbekke qabilettiliginen aiyrylý koeffitsientteri,
- asyraýyndaǵy adamdar sany,
- mindetti áleýmettik saqtandyrý júiesine qatysý ótili,
- tabysty almastyrý.
