2025 – 2027 جىلدارعا ارنالعان رەسپۋبليكالىق بيۋدجەت تۋرالى زاڭدا 2025 جىلعى 1 قاڭتاردان باستاپ مەملەكەتتىك جاردەماقىلار مەن بازالىق زەينەتاقى تولەمدەرىنىڭ بارلىق ءتۇرىن ق ر ۇلتتىق بانكى ايقىندايتىن ينفلياسيانىڭ بولجامدى دەڭگەيىنە سايكەس 6،5 %-عا، ىنتىماقتى زەينەتاقىنى – 8،5 %-عا، ياعني ينفلياسيا دەڭگەيىنەن 2%-عا وزا وتىرىپ ارتتىرۋ كوزدەلگەن، دەپ جازادى Dalanews.kz.

بۇدان بولەك مەملەكەت باسشىسىنىڭ تاپسىرماسى بويىنشا 2023 جىلدان باستاپ بەس جىل ىشىندە ەڭ تومەن بازالىق زەينەتاقىنى ەڭ تومەن كۇنكورىس دەڭگەيىنىڭ 70 %-نا دەيىن، ەڭ جوعارىسى – 120 %-عا دەيىن جىل سايىن كەزەڭ-كەزەڭىمەن ارتتىرۋ جۇزەگە اسىرىلادى، دەپ حابارلايدى ەڭبەك جانە حالىقتى الەۋمەتتىك قورعاۋ مينيسترلىگى.

"ماسەلەن، 2025 جىلعى 1 قاڭتاردان باستاپ بازالىق زەينەتاقىنىڭ ەڭ تومەن مولشەرى ەڭ تومەن كۇنكورىس دەڭگەيىنىڭ 65%-نان 70%-عا دەيىن ۇلعايتىلادى، بۇل 32 360 تەڭگەنى قۇراپ، ونىڭ ەڭ جوعارى مولشەرى ەڭ تومەن كۇنكورىس دەڭگەيىنەن 105-تەن 110%-عا دەيىن ارتتىرىلىپ، 50 851 تەڭگەنى قۇرايدى"، دەلىنگەن رەسمي حابارلامادا.

بۇل رەتتە مينيسترلىك 2019 جىلى زەينەتكە شىققان 69 جاستاعى زەينەتكەردى مىسالعا الىپ، ەسەپ-قيسابىن ۇسىنادى:

"مىسالى، 2019 جىلى زەينەتكەرلىككە شىققان 69 جاستاعى زەينەتكەردىڭ 2024 جىلى بيۋدجەتتەن تولەنەتىن زەينەتاقى مولشەرى 156 856 تەڭگەنى قۇرادى، ونىڭ ىشىندە بازالىق زەينەتاقى تولەمى – 45 578 تەڭگە، ىنتىماقتى زەينەتاقى – 111 278 تەڭگە. 2025 جىلعى 1 قاڭتاردان باستاپ ءوسىمدى ەسكەرە وتىرىپ، وسى زەينەتكەر ءۇشىن زەينەتاقىنىڭ جالپى سوماسى 171 588 تەڭگەگە دەيىن ۇلعايادى، ونىڭ ىشىندە بازالىق زەينەتاقى – 50 851 تەڭگەنى، ىنتىماقتى زەينەتاقى – 120 737 تەڭگەنى قۇرايدى. اتالعان سومالارعا بجزق-داعى تولەمدەر كىرمەيتىنىن اتاپ ءوتۋ ماڭىزدى".

2025 جىلعى 1 قاڭتاردان باستاپ مەملەكەتتىك جاردەماقىلاردىڭ ۇلعايۋىنىڭ بىرنەشە ۇلگىسى:

• 1، 2، 3 بالا تۋعاندا بەرىلەتىن جاردەماقى 140 296 تەڭگەدەن 149 416 تەڭگەگە دەيىن، 4 جانە ودان دا كوپ بالا تۋعاندا بەرىلەتىن جاردەماقى – 232 596 تەڭگەدەن 247 716 تەڭگەگە دەيىن ۇلعاياتىن بولادى؛
• مولشەرى بالالار سانىنا بايلانىستى بەرىلەتىن كوپبالالى وتباسىلارعا ارنالعان  جاردەماقى 4 بالاسى بار وتباسىلار ءۇشىن 59 183 تەڭگەدەن 63 030 تەڭگەگە دەيىن، 10 بالاسى بار وتباسىلار ءۇشىن – 147 680 تەڭگەدەن 157 280 تەڭگەگە دەيىن ۇلعايادى؛
• I توپ مۇگەدەكتىگى بار ادامدارعا ارنالعان جاردەماقى 95 496 تەڭگەدەن 101 702 تەڭگەگە دەيىن، II توپ – 76 397 تەڭگەدەن 81 362 تەڭگەگە دەيىن، III توپ – 52 089 تەڭگەدەن 55 474 تەڭگەگە دەيىن ۇلعايتىلادى.

سونداي-اق، مەملەكەتتىك الەۋمەتتىك ساقتاندىرۋ قورىنان (بۇدان ءارى – ءماسق) اسىراۋشىسىنان ايىرىلۋ جانە ەڭبەككە قابىلەتتىلىگىنەن ايىرىلۋ بويىنشا تولەمدەر 6،5 %-عا ارتادى. اتالعان تولەمدەر مىندەتتى الەۋمەتتىك ساقتاندىرۋ جۇيەسىنە قاتىسۋشىلارعا بيۋدجەتتەن بەرىلەتىن مەملەكەتتىك جاردەماقىلارعا قوسىمشا جۇزەگە اسىرىلادى.

تولەمدەردىڭ مولشەرى جەكە ساناتتارعا جانە كەلەسىلەرگە بايلانىستى بولادى:

• سوڭعى 2 جىلدا ءماسق-عا الەۋمەتتىك اۋدارىمدار جۇرگىزىلگەن ورتاشا ايلىق تابىس،
• ەڭبەككە قابىلەتتىلىگىنەن ايىرىلۋ كوەففيسيەنتتەرى،
• اسىراۋىنداعى ادامدار سانى،
• مىندەتتى الەۋمەتتىك ساقتاندىرۋ جۇيەسىنە قاتىسۋ ءوتىلى،
• تابىستى الماستىرۋ.