Almatyda 2025 jyly biýdjet jobasynda áleýmettik salaǵa 806,1 mlrd teńge bólý josparlanýda, bul aldyn ala aqparat boiynsha qala biýdjeti shyǵystarynyń 41% -yn quraidy. Áleýmettik salany qarjylandyrýdy ulǵaitýdyń boljamdy ósýi 8,7% -dy quraidy. 2024 jyly áleýmettik salaǵa 741,2 mlrd, 2023 jyly 664,5 mlrd baǵyttalǵan, – dep habarlaidy Dalanews.kz Almaty qalasy Máslihatynyń baspasóz qyzmetine silteme jasap.
2025-27 jyldarǵa arnalǵan biýdjettiń tiisti jobasy Almaty Máslihatynyń aldaǵy sessiiasynda qabyldaý qarastyrylýda.
Esterińizge sala keteiik, Máslihattyń kelesi otyrysynda Almatynyń 2025-2027 jyldarǵa arnalǵan biýdjetin bekitý máselesi qaralatyn bolady.
Máslihattyń aldyn ala aqparaty boiynsha, densaýlyq saqtaý infraqurylymyn jańǵyrtýdy qarjylandyrý 2025 jyly 2,6 esege – 69,4 mlrd teńgege deiin ulǵaiady. Sondai-aq 1326 dáriger men meditsinalyq personaldy oqytýdyń úsh deńgeili baǵdarlamasy iske asyrylady. Jańa biýdjetten qarajattyń bir bóligi Bostandyq aýdanynda 500 adam qabyldaityn №4 jedel meditsinalyq járdem qosalqy stantsiiasynyń, eki otbasylyq-dárigerlik ambýlatoriianyń jáne jańa emhananyń qurylysyn aiaqtaýǵa baǵyttalady.
Qalalyq meditsinalyq mekemeler qajetti dári-dármektermen jáne jabdyqtarmen, onyń ishinde vaktsinalarmen jáne immýnoprofilaktikalyq preparattarymen qamtamasyz etiletin bolady. Sirek kezdesetin aýrýlary bar 4 myńnan astam patsient tegin dári-dármektermen qamtylady.
2025 jyly jedel járdemniń avtoparkin jańartý jalǵasady, ol úshin 50 avtokólik satyp alý josparlanýda. Sonymen qatar, 2024-2025 jyldary 20 densaýlyq saqtaý nysany kúrdeli jóndeýden ótedi, onyń ishinde on nysandy 2025 jyly aiaqtaý josparlanyp otyr jáne 30 jańa jáne eski densaýlyq saqtaý nysandaryn jobalaý jumystary jalǵasýda.
