Memleket Basshysy Qasym-Jomart Toqaevtyń Joldaýyn oryndaý aıasynda Shyǵys Qazaqstan oblysynyń eldi mekenderin kógaldandyrýdyń 2021-2025 jyldarǵa arnalǵan óńirlik jospary bekitilip, 5 jyl ishinde 476,5 myń aǵash otyrǵyzý josparlanǵan. Bul týraly SHQO RSK brıfıńinde Tabıǵı resýrstar jáne tabıǵatty paıdalanýdy retteý basqarma basshysynyń orynbasary Elaman Muhtarhanov málimdedi, – dep habarlaıdy Dalanews.kz.

– Shyǵys Qazaqstan oblysy boıynsha 277 myń aǵash otyrǵyzyldy, al Óskemen qalasy boıynsha – 26 myń aǵash kósheti otyrǵyzyldy. Budan basqa, Joldaý sheńberinde oblystyń 2021-2025 jyldarǵa arnalǵan ormandardy molyqtyrý jáne orman ósirý kólemin ulǵaıtýdyń keshendi jospary ázirlendi, bes jyl ishinde otyrǵyzýdyń jalpy aýdany 15 myń gektardy quraıdy, 76 mln - nan astam kóshet otyrǵyzylady, – dedi Elaman Muhtarhanov.

Sondaı-aq, ol búgingi kúni óńir jurtshylyǵynyń qatysýymen ázirlengen 2020-2024 jyldarǵa arnalǵan ekologıalyq problemalardy keshendi sheshý jónindegi Jol kartasyn iske asyrý júrip jatqanyn aıtty.

QR Ekologıalyq kodeksiniń talaptaryn oryndaý maqsatynda úsh jylǵa perspektıvaǵa arnalǵan qorshaǵan ortany qorǵaý jónindegi is-sharalar jospary ázirlendi.