Jetisý oblysynda qazirgi kezde gazdandyrý deńgeıi 56,5% quraıdy, ıaǵnı 63 eldi meken gazdandyryldy. Al bıylǵy jyldyń qorytyndysy boıynsha taǵy 63 jobany iske asyrýdyń arqasynda gazdandyrý deńgeıi 71,4% jetedi. Osylaısha 500 myńnan astam turǵyny bar 126 eldi meken gazǵa qol jetkizedi. Bul týraly oblys ákimi Beıbit Isabaev «Jetisy» telearnasy stýdıasynda oblystyq BAQ ókilderine bergen keńeıtilgen suhbaty barysynda aıtty, - dep habarlaıdy Dalanews.kz Jetisý oblysy ákiminiń baspasóz qyzmetine siltep.
"Oblys qaıta qurylǵan kezde 5 eldi mekenge ǵana gaz jetkizilgen, ıaǵnı gazdandyrý kórsetkishi 29 % bolǵan. Bıyl gazben qamtamasyz etilgen eldi mekender sany 63-ke jetip, turǵyndardy gazdandyrý kórsetkish 56,5% qurady. Memleket basshysynyń tapsyrmasyn oryndaý aıasynda jyldyń sońyna deıin taǵy 63 eldi meken gazǵa qosylady, sonyń ishinde 45 jobanyń jumystary qazir júrip jatyr, 18-iniń jobalyq-smetalyq qujattary daıyn. Osy atalǵan jobalar iske asyrylǵannan keıin bıylǵy jyldyń qorytyndysy boıynsha 500 myńnan astam turǵyny bar 126 eldi mekenge gaz jetkizip, halyqty gazdandyrý deńgeıi 71,4 % bolady. Oǵan qosa «Taldyqorǵan – Úsharal» baǵytyndaǵy gaz qubyrynyń qurylysyn byltyr bastadyq. Ol bıylǵy jyldyń sońyna deıin bitedi. Aqsý, Sarqan, Alakól aýdandarynyń 66 eldi mekenin gazdandyrý boıynsha jobalyq-smetalyq qujattama ázirlenip jatyr. Magıstral qurylysy bitkennen keıin gaz tartý jumystaryna kirisedi. Sonyń nátıjesinde 192 eldi meken gazdandyrylyp, oblystyń 624 myńnan astam turǵyny nemese halyqtyń 91 paıyzy gazǵa qol jetkizedi", - dedi Isabaev.
Al gaz qunyn qostyrýǵa qatysty máseleniń óńir basshysy osydan bir jarym jyl buryn qolǵa alynǵanyn aıtty. Gaz qosý qunynyń joǵarylyǵynyń sebebin zerdelep qaraǵanda, gaz qosý naryǵynda 1-2 kompanıa monopolıs bolyp otyrǵany baıqalǵan. Degenmen qabyldanǵan sharalardyń arqasynda básekelestik ortany damytý arqyly gaz qostyrý qunyn qazandyq pen qajetti jıyntyqtardy qospaǵanda 170-175 myń teńgege deıin tómendetýge múmkindik týdy (gaz qubyrynyń uzyndyǵy 25 metrge deıin).
Oǵan qosa, bir jarym jyldyń ishinde 1600 gaz qazandyǵyn satyp alýǵa 500 mıllıon teńge bólindi, turǵyndarǵa qazandyqtyń tólemin 10 aıǵa deıin bólip tóleýge jeńildikti jaǵdaı jasalyp otyr.
