Biyl elimizdiń sý qoimalaryna rekordty - 75 mlrd tekshe metrden astam sý jinaldy. Onyń 12 mlrd tekshe metrden astamy tasqyn sýy, dep habarlaidy Dalanews.kz.
Sý resýrstary jáne irrigatsiia ministrliginiń málimetinshe, tasqyn sýyn durys bólý sý qoimalaryn toltyryp qana qoimai, sońǵy jyldary qurǵaýǵa ainalǵan ózender men kólderge, shabyndyqtarǵa, tabiǵi jaiylymdarǵa jáne basqa da aidyndarǵa sý jiberýge múmkindik berdi.
Jyl basynan beri Balqash kóline 15,4 mlrd tekshe metr sý keldi, bul ótken jylǵy kórsetkishten 4 mlrd tekshe metrge artyq. Onyń ishinde tasqyn kezinde 3,3 mlrd tekshe metr sý tústi. Jyl basynan beri Kaspii teńizine 17 mlrd tekshe metr sý keldi. Almaty oblysyndaǵy Qapshaǵai sý qoimasy sońǵy 10 jylda alǵash ret 100%-ǵa tolyp, 18 mlrd tekshe metrden astam sý jinady.
Sý tasqyny kezinde Batys Qazaqstan oblysynyń Qamys-Samar kólderine 80 mln tekshe metr sý jiberildi. Ulytaý oblysynan Qyzylorda oblysyna 839 mln tekshe metr sý keldi. Osynyń arqasynda, baqylaý tarihynda alǵash ret bul sý Sarysý ózeni arqyly Qyzylorda oblysynyń kólder júiesine jetti.
Sý diplomatiiasy, sýdy dál bólý jáne sý únemdeý tehnologiialaryn engizý arqyly elimizdiń ońtústiginde sý balansyn jaqsartýǵa qol jetkizildi.
Máselen, biyl Soltústik Aralǵa shamamen 2,5 mlrd tekshe metr sý jiberildi, bul 2023 jylmen salystyrǵanda 400 mln tekshe metrge artyq. Bul rette, Qyzylorda oblysynyń sharýalary sý únemdeý tehnologiialaryn paidalanǵandyqtan 200 mln tekshe metrge deiin sý únemdep, ol sý Soltústik Aralǵa jiberilgenin de aita ketken jón.
Jyl basynan beri Qyzylorda oblysynyń kólder júiesine 4,7 mlrd tekshe metrden astam sý jiberildi. Salystyrý úshin, ótken jyly bul kórsetkish shamamen 4,3 mlrd tekshe metr edi.
"Biz árqashan sý resýrstaryn bólýde ekonomikanyń qajettilikteri men sý nysandarynyń ekojúiesin qoldaý arasyndaǵy durys tepe-teńdikti izdeimiz. Biyl sharýalar men basqa da sý paidalanýshylarǵa keri áserin tigizbesten úlken jáne shaǵyn sý aidyndaryn saqtaý jáne qalpyna keltirý boiynsha úlken jumys atqaryldy.
Mysaly, ótken sýarý kezeńinde elimizdiń sharýa qojalyqtaryna shamamen 11 mlrd tekshe metr sý berildi. Bolashaqta bul baǵyttaǵy jumys jaqsarady. Onyń ishinde sýdy saýatty basqarý jáne tutynýǵa basymdyq beretin jańa normativtik-quqyqtyq baza qurý esebinen de nátijege jetýge niettimiz", - dedi Sý resýrstary jáne irrigatsiia ministri Nurjan Nurjigitov.
