Qazaqstanda kıim-keshek, aıaq kıim jáne avtokólikter EAEO elderimen salystyrǵanda eń joǵary qarqynmen qymbattaǵan. 2024 jyldyń qorytyndysy boıynsha (12 aıda) Qazaqstanda azyq-túlikke jatpaıtyn taýarlar orta eseppen 8,3%-ǵa qymbattap, Eýrazıalyq ekonomıkalyq odaqtaǵy eń mańyzdy kórsetkish retinde tirkeldi, dep jazady Dalanews.kz DATA HUB málimetterine súıene otyryp.

Eýrazıalyq ekonomıkalyq komısıasy jarıalaǵan taýarlar tizbeginde bizdiń eldegi azyq-túlikke jatpaıtyn ónimderdiń biqatarynyń birden qymbattaýy EAEO elderi arasynda birden kózge túsedi.

Sonymen EAEO-daǵy baǵanyń ortasha qarqyny 4,1% bolǵanda Qazaqstanda kıim-keshek pen tósek jaımalarynyń baǵasy 9,9%-ǵa ósken. 

Qazaqstanda aıaq-kıim bir jyl ishinde 11,4%-ǵa qymbatassa, bul kórsetkish EAEO boıynsha 4,8%-dy quraǵan. Balalar aıaq-kıimi boıynsha alshaqtyq odan da kóp: bizde 13,3%, al ekonomıkalyq odaqta 3,6% ósim tirkelgen.

Qazaqstandyq tutynýshylar úshin matalar 8,0%-ǵa qymbattasa, bul rettegi EAEO boıynsha ortasha kórsetkish -3,5%.

EAEO boıynsha jeńil kólikter ortasha eseppen 3,3%-ǵa qymbattasa, al bizdegi bul rettegi ósim 6,4%-dy quraıdy. Sonymen qatar Armenıada, Belarýs elinde, Qyrǵyz Respýblıkasynda jeńil kólikter, kerisinshe bir jyl ishinde birshama arzandady.

Jıhaz Qazaqstanda 10,2%-ǵa, EAEO-da 6,9%-ǵa qymbattady.

Qazaqstanda teledıdarlardyń qymbattaýy anomaldy kórinis retinde sıapattaldy: bizdegi baǵa ósimi 37,5%, EAEO boıynsha – 5,3%.  

Buǵan deıin saıtymyzda "Inflásıa boljamdy kórsetkishten asyp túsip, sarapshylar shý etti" degen maqala jarıalanǵan bolatyn. Onda 2025 jyly qańtardaǵy derek boıynsha, Qazaqstandaǵy ınflásıa 8,9% quraǵany aıtylady.Bul sıfr boljamdy kórsetkishterden de joǵary bolyp, sarapshylar der ýaqytynda shara qabyldamaǵan Ulttyq bankti aıyptady. Al Ulttyq bank elimizde toqtaýsyz ósip jatqan tutynýshylyq nesıe buǵan sebep ekenin aıtady.