– Bizdiń mindet – bilim salasyn ekonomıkalyq ósimniń jańa modeli úshin ortalyq býynǵa aınaldyrý. Osy oraıda biz ınfraqurylymdyq damý jáne Nazarbaev zıatkerlik mektebi tájirıbesi boıynsha jańartylǵan mazmunǵa kóshý baǵytynda alǵa jyljyp kelemiz. Biz úshtildilik oqytýdy engizý boıynsha iri jobany jalǵastyryp jatyrmyz. Alǵashqy eki kezeńde oblystyń barlyq mektepteri úshin tilder boıynsha jańa oqýlyqtar ázirlendi jáne satylyp alyndy, til pánderiniń 3400 oqytýshysyna dıagnostıka jáne oqytý júrgizildi. Jumys osy jyly da jalǵasady, – dep málimdedi SHQO ákimi Danıal Ahmetov óziniń turǵyndar aldyndaǵy esebinde.
Belgili bolǵandaı, úzdik nátıje kórsetken muǵalimder úshin saralanǵan materıaldyq yntalandyrý júıesi qarastyrylǵan. Ol eń aldymen oqýshylar bilimin baǵalaýǵa negizdelipti. 2017 jyly tildik pánderdiń 12 muǵalimine 170 myń teńgeden 800 myń teńgege deıingi syıaqylar tabystalǵan.
Sonymen qatar, ótken oqý jyly qorytyndysy boıynsha UBT-nyń ortasha oblystyq kórsetkishi respýblıkalyq deńgeıden 1,7 balǵa asty jáne 82,2 baldy qurady.
Testileýge qatysýdyń eń kóp úlesi jáne joǵary kórsetkishter Kókpekti (93,9 paıyz), Aıagóz (90 paıyz), Tarbaǵataı (88 paıyz) aýdandarynda baıqalady.
100 baldan joǵary upaıdy 20 aýyldyq jáne nebári 9 qalalyq mektep jınady. «Óskemen qalasy bul tizimge úsh mekteppen ilingen, al Semeı tizimde múldem joq. Meniń oıymsha, bul sıfrlar bizdiń iri qalalardaǵy bilim deńgeıiniń aıtarlyqtaı qulap qalǵanyn kórsetedi. Bul alańdatarlyq jaǵdaı, osy rette bárimizge jumys isteý kerek», – dep túıindedi aımaq basshysy.
https://dalanews.kz/34308
