«Damý» qory – Ulttyq ekonomika ministrligi jáne «Báiterek» holdinginiń qoldaýymen jańa «Órleý» baǵdarlamasyn iske qosty. Jobanyń maqsaty – ekonomikanyń basym sektorlarynda kásipkerlikti jeńildetilgen nesiemen qoldaý. Bul týraly Túrkistan oblysyndaǵy «Damý» qorynyń direktory Muǵazan Nurmahanuly baiandady.
– Memleket basshysynyń tapsyrmasyna jáne Úkimettiń 2025 jylǵy 2 sáýirdegi Qaýlysyna sáikes, kásipkerlikti qarjylandyrýdaǵy negizgi kedergilerdiń biri – kepilzattyń jetkiliksizdigi máselesin sheshý maqsatynda eki jańa kepildik quraly engizildi. Endi kásipker bankten nesie alarda kepilzat jetpegen jaǵdaida tómendegidei qoldaý usynylady. Kepildik qory sheńberinde shaǵyn, orta jáne iri biznes nysandary qatysa alady.
Negizgi sharttary – kepildik beriletin joba aiasynda qarjylandyrý somasy 7 mlrd teńgeden aspaidy. Kepildiktiń eń joǵary mólsheri – qarjylandyrý somasynyń 85%-yna deiin, biraq 3,5 mlrd teńgeden aspaýy tiis.
Al kepildik merzimi – 5 jylǵa deiin. Bul jeńildikter – aýyl, orman jáne balyq sharýashylyǵy, taý-ken ónerkásibi, óńdeý ónerkásibi, elektr jáne jylý energiiasy, sýmen jabdyqtaý, saýda, kólik jáne qoimalaý, týrizm, aqparat jáne bailanys, jyljymaityn múlik, bilim berý, densaýlyq saqtaý, áleýmettik qyzmetter, mádeniet, óner, oiyn-saýyq baǵytynda kásip bastaǵysy keletin azamattar úshin qarastyrylǵan.
Biylǵy jyldyń basynan beri qor arqyly 200-den astam azamat óz kásibin bastaýǵa múmkindik aldy. Bul maqsatta 3,5 mlrd teńge qarjy jumsaldy. Eger de óziniń biznes ideialaryn júzege asyrǵysy keletin jandar bolsa qordyń oblystaǵy bólimshesine kelip mamandardan keńes ala alady, – dedi sala basshysy.
