Almaty turǵyndarynyń jylý men ystyq sý úshin jinalyp qalǵan jalpy bereshegi 2 milliard teńgege jetti, dep habarlaidy Dalanews.kz.
Sot sheshimine sáikes, olardyń shottary buǵattalyp, keibirine shetelge shyǵýǵa tyiym salyndy
“Almatylyq jylý jelileri” JShS habarlaýynsha, boryshkerlerge qatysty zań aiasynda birqatar shekteý sharalary qolǵa alynǵan. Atap aitqanda, múlik pen bank shottaryna tyiym salynyp, shetelge shyǵýǵa shekteý qoiylǵan. Sondai-aq tolyq tólem jasalǵanǵa deiin keibir tutynýshylardy ystyq sýmen jabdyqtaý ýaqytsha toqtatylǵan.
Jyl basynan beri 600-den astam abonentke osyndai shekteý sharalary qoldanylǵan. Al zańdy tulǵalarǵa 3345-ke jýyq sotqa deiingi talap aryz joldanǵan.
“Jylý men ystyq sý úshin tólem jasamaǵan 5184 boryshkerge qatysty qaryz óndirý jumystary júrgizildi. Bul maqsatta sottarǵa talap-aryzdar berilip, notariýstar arqyly atqarýshylyq jazbalar rásimdeldi”, — delingen mekeme taratqan resmi málimdemede.
Búginde 1754 boryshkerge qatysty naqty shekteýler engizilgen:
– 926 azamattyń jyljymaityn jáne jyljymaly múlkine tyiym salyndy;
– 822 boryshkerdiń bank shottary buǵattaldy;
– 254 adamnyń Qazaqstannan shyǵýyna shekteý qoiyldy;
– 144 turǵynnyń jalaqysy men ózge de kirisinen qaryz májbúrli túrde ustaldy.
“Almatylyq jylý jelileri” kompaniiasy turǵyndardy jaýapkershilikke shaqyryp, qyzmet aqysyn der kezinde tóleýge úndeidi.
