الماتى تۇرعىندارىنىڭ جىلۋ مەن ىستىق سۋ ءۇشىن جينالىپ قالعان جالپى بەرەشەگى 2 ميلليارد تەڭگەگە جەتتى، دەپ حابارلايدى Dalanews.kz.
سوت شەشىمىنە سايكەس، ولاردىڭ شوتتارى بۇعاتتالىپ، كەيبىرىنە شەتەلگە شىعۋعا تىيىم سالىندى
“الماتىلىق جىلۋ جەلىلەرى” ج ش س حابارلاۋىنشا، بورىشكەرلەرگە قاتىستى زاڭ اياسىندا ءبىرقاتار شەكتەۋ شارالارى قولعا الىنعان. اتاپ ايتقاندا، مۇلىك پەن بانك شوتتارىنا تىيىم سالىنىپ، شەتەلگە شىعۋعا شەكتەۋ قويىلعان. سونداي-اق تولىق تولەم جاسالعانعا دەيىن كەيبىر تۇتىنۋشىلاردى ىستىق سۋمەن جابدىقتاۋ ۋاقىتشا توقتاتىلعان.
جىل باسىنان بەرى 600-دەن استام ابونەنتكە وسىنداي شەكتەۋ شارالارى قولدانىلعان. ال زاڭدى تۇلعالارعا 3345-كە جۋىق سوتقا دەيىنگى تالاپ ارىز جولدانعان.
“جىلۋ مەن ىستىق سۋ ءۇشىن تولەم جاساماعان 5184 بورىشكەرگە قاتىستى قارىز ءوندىرۋ جۇمىستارى جۇرگىزىلدى. بۇل ماقساتتا سوتتارعا تالاپ-ارىزدار بەرىلىپ، نوتاريۋستار ارقىلى اتقارۋشىلىق جازبالار راسىمدەلدى”، — دەلىنگەن مەكەمە تاراتقان رەسمي مالىمدەمەدە.
بۇگىندە 1754 بورىشكەرگە قاتىستى ناقتى شەكتەۋلەر ەنگىزىلگەن:
– 926 ازاماتتىڭ جىلجىمايتىن جانە جىلجىمالى مۇلكىنە تىيىم سالىندى؛
– 822 بورىشكەردىڭ بانك شوتتارى بۇعاتتالدى؛
– 254 ادامنىڭ قازاقستاننان شىعۋىنا شەكتەۋ قويىلدى؛
– 144 تۇرعىننىڭ جالاقىسى مەن وزگە دە كىرىسىنەن قارىز ءماجبۇرلى تۇردە ۇستالدى.
“الماتىلىق جىلۋ جەلىلەرى” كومپانياسى تۇرعىنداردى جاۋاپكەرشىلىككە شاقىرىپ، قىزمەت اقىسىن دەر كەزىندە تولەۋگە ۇندەيدى.
