1987 jyly poliaktar Qairat Rysqulbekovtyń erligi úshin poshta markasyn shyǵarypty
Markada shalqasynan qulap jatqan er adamnyń beinesiniń ústinde «Q.Rysqulbekovke raqymshylyq jasalsyn. ALMA-ATA 18.06.1987» dep jazylǵan. Gorbachevtiń sýretiniń astynda «Ashyqtyq qaida!?» degen suraq tur.
— Markanyń astyńǵy jaǵyndaǵy jazý poliak tilinen aýdarǵanda «Markany satýdan túsken tabys «Erkindik pen beibitshilik» qozǵalysyna beriledi» degen jazý,— dedi Vladyslav Sokolovskii.
Varshavadan kelgen ǵalym Jeltoqsan oqiǵasy týraly 1986-87 jyldary Polshada elýden astam merzimdi basylymda jariialanǵan materialdarǵa sholý jasady.
Jeltoqsan oqiǵasynyń qaharmany Qairat Noǵaibaiuly Rysqulbekov 1986 jyly 16-18 jeltoqsanda Almatydaǵy oqiǵaǵa belsene qatysqan jastardyń biri ekeni belgili. Q.Rysqulbekov 1987 jylǵy 16 maýsymda Qazaq KSR Joǵarǵy Sotynyń qylmystyq ister jónindegi kollegiiasy úkimimen eń joǵarǵy jaza — ólim jazasyna kesilip, keiin atý jazasy 20 jylǵa bas bostandyǵynan aiyrý jazasymen aýystyrylǵan bolatyn. Alaida, Q.Rysqulbekov túrmede qupiia jaǵdaida qaza boldy. Qazaqstan egemendik alǵannan keiin ǵana Qairat Rysqulbekov Qazaqstan Joǵarǵy Soty Plenýmynyń 1992 jyly 21 aqpandaǵy sheshimimen tolyqtai aqtaldy. 1996 jylǵy 9 jeltoqsanda QR Prezidenti N.Nazarbaevtyń Jarlyǵymen Q.N. Rysqulbekov qaitys bolǵannan keiin Halyq Qaharmany ataǵymen, «Otan» ordenimen marapattalǵan.
Osy oraida, Polshanyń «Yntymaqtastyq» uiymy týraly da az-kem aita keteiik. Jumysy totalitarlyq rejimge, kommýnistik júiege qarsy baǵyttalǵan «Yntymaqtastyq» Polsha kásipodaqtary birlestiginiń qyzmeti 1989 jyldyń sáýirinde ǵana zańdastyrylǵan. Qazirgi tańda ol Polsha Respýblikasynyń kásipodaǵy degen atpen jumysyn jalǵastyrýda. Uiymnyń negizin qalaǵan Leh Valensa 1983 jyly «Adam quqy úshin kúresker» retinde Beibitshilik jónindegi Nobel syilyǵymen marapattalǵanyn atap ótý kerek.
Arnur ASQAROV
