Ulttyq bank bazalyq mólsherlemeni 18% deńgeiinde saqtap otyr. Sarapshylardyń pikirinshe, bul sheshim infliatsiia qysymyn tejeýge baǵyttalǵanymen, ekonomika men biznes belsendiligine aitarlyqtai áser etip otyr, dep habarlaidy Dalanews.kz.
Sarapshylardyń pikirinshe, joǵary paiyz mólsherlemesi investitsiialyq kreditti shektep, biznestiń damý qarqynyn baiaýlatady. Qaryz qymbattaǵan kezde kompaniialar jańa jobalardy iske qosýdan góri qoldaǵy qarjyny saqtaýǵa basymdyq beredi. Nátijesinde kásiporyndardyń uzaq merzimdi josparlaý múmkindigi qysqaryp, ekonomikalyq belsendilik tómendeýi yqtimal. Ásirese, shaǵyn jáne orta bizneske, sondai-aq, iri kapital salýdy qajet etetin salalarǵa salmaq túsedi.
Qarjy mamandarynyń aitýynsha, korporativtik kreditterdiń quny 20–30% deńgeiine jetken jaǵdaida nesie damý quraly bolýdan qalyp, tek qazirgi qajettilikti jabýǵa arnalǵan quralǵa ainalady. Mundai kezeńde bankter úshin táýekeli tómen memlekettik baǵaly qaǵazdarǵa investitsiia salý tiimdirek kórinedi. Sonyń saldarynan iri investitsiialyq jobalar sany qysqarady.
Qymbat kapital biznes shyǵyndary ósýine de áser etedi. Qoljetimdi qarjylandyrý bolmaǵan jaǵdaida kásiporyndar shyǵyndy taýar men qyzmet baǵasyna qosýǵa májbúr bolady. Bul óz kezeginde infliatsiiany tejeýge baǵyttalǵan saiasattyń tiimdiligin álsiretýi múmkin. Iaǵni mólsherleme suranysty qysqartqanymen, óndiris shyǵyndarynyń ósýi arqyly baǵaǵa janama qysym jasaidy.
Mysaly, kompaniia 120 mln teńgege úsh kólikti lizingke alýdy josparlasa, paiyz mólsherlemesi ósken saiyn jobanyń jalpy quny aitarlyqtai ósedi. Tólem kólemi ulǵaiýy bizneske qosymsha qarjylyq júk túsirip, investitsiialyq sheshimderdi keiinge qaldyrýǵa itermeleidi.
Sarapshylar joǵary bazalyq mólsherleme qysqa merzimde qarjylyq turaqtylyqty qamtamasyz etse de, uzaq merzimdi ekonomikalyq ósimge shekteý qoiatynyn atap ótedi. Sondyqtan infliatsiiamen kúres tek aqsha-kredit quraldarymen shektelmei, tiimdi biýdjet saiasaty, qurylymdyq reformalar jáne investitsiialyq ortany jaqsartý sharalarymen qatar júrýi qajet. Mamandardyń sózinshe, osyndai keshendi tásil ǵana ekonomikanyń turaqty damýyna múmkindik beredi.
