Qaraǵandyda Shahterler kúnine arnalǵan úlken kontsertten keiin álemge tanymal qazaqstandyq ánshi Dimash Qudaibergen Qarmet kompaniiasynyń Kostenko atyndaǵy shahtasyna baryp, kenshilerdiń jumysymen tanysty.
Ánshi shahtaǵa túsip, jer astyna 700 metr tereńdikke bardy. Sapar barysynda ol kásiporynnyń jumysymen tanysyp, shahtadaǵy zamanaýi qaýipsizdik júieleri men qyzmetkerlerdiń ornalasqan jerin naqty ýaqyt rejiminde baqylaýǵa múmkindik beretin pozitsiialaý júiesiniń jumysyn kórdi.
Dimashtyń aitýynsha, shahterler kúnine orai Qaraǵandyda shamamen 250 myń adam jinalǵan úlken kontsertten keiin shahtaǵa arnaiy barǵan.
«Úlken kontsertten keiin, Qaraǵandyda Shahterler kúnine orai shamamen 250 myń adam jinalǵan sharadan soń, Kostenko atyndaǵy Qarmet shahtasyna bardym. 700 metr tereńdikke túsip, shahterlerdiń qandai jaǵdaida jumys isteitinin, olardyń eńbeginiń qanshalyqty kúrdeli ári jaýapty ekenin óz kózimmen kórdim. Maǵan shahtanyń jumysyn, adamdardyń jer astynda júrgenin baqylaýǵa múmkindik beretin zamanaýi qaýipsizdik jáne pozitsiialaý júielerin kórsetti. Shahtalardyń jańaryp jatqany qýantady. Biraq eń bastysy – shahterlermen jeke kezdesip, olardy kásibi merekelerimen quttyqtai alǵanym. Bul mamandyq ielerine degen qurmetim zor. Sizderdiń eńbekterińiz erekshe qurmetke laiyq! Shahterler kúni qutty bolsyn! Myqty densaýlyq, baq-bereke jáne qaýipsiz aýysym tileimin! Raqmet, Qarmet!» – dedi ónerpaz.
Ánshi úshin bul sapar zamanaýi jerasty óndirisi men qaýipsizdik tehnologiialaryn kórýmen qatar, kún saiyn jerdiń júzdegen metr tereńdiginde eńbek etetin adamdardyń jumysymen jaqynyraq tanysýǵa múmkindik berdi.
Dimash shahtada kenshilermen kezdesip, olardyń eńbegine qurmetin bildirdi.
Kostenko atyndaǵy shahtaǵa barýy ánshiniń shahterler eńbegine degen qurmetiniń taǵy bir belgisi boldy. Kenshiler Qaraǵandy óńiriniń kómir salasynyń turaqty jumysyn qamtamasyz etip, kún saiyn kúrdeli ári jaýapty jaǵdaida eńbek etedi.
