Қарағандыда Шахтерлер күніне арналған үлкен концерттен кейін әлемге танымал қазақстандық әнші Димаш Құдайберген Qarmet компаниясының Костенко атындағы шахтасына барып, кеншілердің жұмысымен танысты.
Әнші шахтаға түсіп, жер астына 700 метр тереңдікке барды. Сапар барысында ол кәсіпорынның жұмысымен танысып, шахтадағы заманауи қауіпсіздік жүйелері мен қызметкерлердің орналасқан жерін нақты уақыт режимінде бақылауға мүмкіндік беретін позициялау жүйесінің жұмысын көрді.
Димаштың айтуынша, шахтерлер күніне орай Қарағандыда шамамен 250 мың адам жиналған үлкен концерттен кейін шахтаға арнайы барған.
«Үлкен концерттен кейін, Қарағандыда Шахтерлер күніне орай шамамен 250 мың адам жиналған шарадан соң, Костенко атындағы Qarmet шахтасына бардым. 700 метр тереңдікке түсіп, шахтерлердің қандай жағдайда жұмыс істейтінін, олардың еңбегінің қаншалықты күрделі әрі жауапты екенін өз көзіммен көрдім. Маған шахтаның жұмысын, адамдардың жер астында жүргенін бақылауға мүмкіндік беретін заманауи қауіпсіздік және позициялау жүйелерін көрсетті. Шахталардың жаңарып жатқаны қуантады. Бірақ ең бастысы – шахтерлермен жеке кездесіп, оларды кәсіби мерекелерімен құттықтай алғаным. Бұл мамандық иелеріне деген құрметім зор. Сіздердің еңбектеріңіз ерекше құрметке лайық! Шахтерлер күні құтты болсын! Мықты денсаулық, бақ-береке және қауіпсіз ауысым тілеймін! Рақмет, Qarmet!» – деді өнерпаз.
Әнші үшін бұл сапар заманауи жерасты өндірісі мен қауіпсіздік технологияларын көрумен қатар, күн сайын жердің жүздеген метр тереңдігінде еңбек ететін адамдардың жұмысымен жақынырақ танысуға мүмкіндік берді.
Димаш шахтада кеншілермен кездесіп, олардың еңбегіне құрметін білдірді.
Костенко атындағы шахтаға баруы әншінің шахтерлер еңбегіне деген құрметінің тағы бір белгісі болды. Кеншілер Қарағанды өңірінің көмір саласының тұрақты жұмысын қамтамасыз етіп, күн сайын күрделі әрі жауапты жағдайда еңбек етеді.
