2026 jyldyń basynan beri Mianma, Kambodja jáne Laosta eńbek quldyǵyna tap bolǵan 17 Qazaqstan azamaty elge qaitaryldy. Bul týraly QR Syrtqy ister ministrligi Kazinform agenttiginiń resmi saýalyna bergen jaýabynda málimdedi, dep habarlaidy dalanews.kz.
Vedomstvonyń málimetinshe, azamattardyń elge aman-esen oralýyna qazaqstandyq diplomattar yqpal etken.
«2026 jylǵy 20 mamyrdaǵy jaǵdai boiynsha Qazaqstannyń Tailandtaǵy elshiliginiń qoldaýymen Mianmadan bes azamat elge qaitaryldy. Sondai-aq Qazaqstannyń Vetnamdaǵy elshiliginiń qatysýymen Kambodjadan segiz jáne Laostan tórt Qazaqstan azamaty elge oraldy», – delingen ministrlik jaýabynda.
SIM málimetinshe, 2022 jyldan beri qazaqstandyq diplomattardyń kómegimen zańsyz ustalyp, eńbek qanaýyna ushyraǵan 66 Qazaqstan azamaty shetelden elge qaitarylǵan. Eske salsaq, sońǵy birneshe jylda ǵana Mianmadaǵy alaiaqtyq ortalyqtarynan (skam-ortalyqtardan) bosatylǵan 49 qazaqstandyq elge jetkizilgen.
