16 jastaǵy qazaqstandyq vinger Kárim Mendikanov resmi túrde kataloniialyq «Barselona» klýbynyń oiynshysy atandy. Ol jańa maýsymda klýbtyń jastar quramasynda óner kórsetedi, dep habarlaidy dalanews.kz.
Bul transfer jas fýtbolshynyń mansabyndaǵy mańyzdy kezeń sanalady. Kárim Mendikanov 2022 jyly otbasymen birge Ispaniiaǵa qonys aýdarǵan. Alǵashynda «Serdanola» klýbynda, keiin «San-Kýgat» sapynda dop tepken qazaqstandyq fýtbolshy qysqa ýaqyt ishinde negizgi quram oiynshysyna ainaldy.
Onyń alańdaǵy jarqyn oiyny «Barselonanyń» selektsionerleriniń nazaryn aýdaryp, nátijesinde kataloniialyq klýb jas talantpen kelisimshart jasasty.
Osylaisha, Kárim Mendikanov jańa maýsymda álemdegi eń tanymal fýtbol akademiialarynyń biri sanalatyn «Barselonanyń» jastar komandasynda óner kórsetetin bolady.
