Búgin, 15 qazan kúni bir top buzaqynyń qolynan qaza tapqan 16 jastaǵy Sherzat Bolattyń isine qatysty Ishki ister ministrliginiń brifingi ótti, dep habarlaidy Dalanews.kz.
Jýrnalisterge dúkende janjaldyń bastalý sáti jazylǵan beinejazba usynyldy.
IIM-niń birinshi orynbasary Baýyrjan Alenovtiń aitýynsha, tergeý zańǵa sáikes júrgizilýde, al oqiǵa ornynda túsirilgen video qylmystyq is materialdaryna qosylǵan. Politsiia beinejazbaǵa eshqandai montaj jasalmaǵanyn rastady. Videoda kúdiktilerdiń syra men temeki satyp alý sáti jáne tólem jasaǵany kórsetilgen. Buǵan qosa, Alenov janjal syranyń aqysyn tólemegennen bastaldy degen boljamdy joqqa shyǵardy.
Beinejazbanyń egjei-tegjeiin IIM ókili Samat Aiysov túsindirip berdi. Ol “Qamajai” dúkeniniń ishki jaǵynda eki, syrtqy jaǵynda bir kamera ornatylǵanyn atap ótti.
“Kúdikti dúkenge kirip, eki bótelke syra men tórt qorap temeki satyp alyp, tólem týraly chek kórsetedi. Marqumnyń ákesi telefonynan teksergende, aqshanyń túspegenin baiqaidy, biraq bir minýttan keiin tranzaktsiiany rastaidy. Keiin kúdikti taǵy bir bótelke syra alyp, 1000 teńgeni qolma-qol tólep, shamamen 500 teńge qaitarym alady. Er adamdar arasynda qol qimyldary arqyly dostyq qarym-qatynasty bildiretin belgiler almasqan, eshqandai janjal baiqalmaǵan.
Keiin kúdikti dúkenge qaita kelip, telefonyn qýattaýǵa qoiýdy surap, 4 minýttan soń telefonyn alý úshin qaita oralady”, – dedi ol.
Osy sátte marqum Sherzat syrtqa shyǵyp ketedi. Al keiin Qarjaýbai Nurymov daladan shý estip, dúkenniń kireberisine shyǵady. Sol jerde onyń uly men kúdikti turǵany kórinedi.
Kadrlarda ákesiniń kúdiktini ustap turǵany jáne ulyna eskertý jasap jatqan sáti baiqalady. Keiin ol kúdiktige betin jýý úshin bótelkemen sý alyp shyǵady.
“Keiin ekinshi kúdikti kelip, marqumnyń ákesimen daýlasyp, telefonyn kórsetken”, – delingen beinejazbada.
IIM ókili Samat Aiysovtyń aitýynsha, Sherzat Bolattyń ákesi dúkenge kúdiktilermen birge kirip, qolyna belgisiz zat ustap shyǵady. Ol kúdiktilerdiń artynan barmaq bolǵanda, uly ony toqtatady.
“Jazbada toptaǵy qyzdardyń biri er adamdardy ajyratýǵa tyrysyp, bireýin shetke alyp ketkeni anyq kórinedi. Sonymen qatar, videojazbadan qyzdardyń belsendi áreketteri baiqalmaidy”, – delingen IIM málimetinde.
Odan keiingi oqiǵalar kadr syrtynda qalǵan. IIM ókilderi bul boiynsha tergeý júrgizilip jatqanyn jáne oqiǵaǵa qatysýshylardyń barlyǵy anyqtalǵanyn aitty.
