بۇگىن، 15 قازان كۇنى ءبىر توپ بۇزاقىنىڭ قولىنان قازا تاپقان 16 جاستاعى شەرزات بولاتتىڭ ىسىنە قاتىستى ىشكى ىستەر مينيسترلىگىنىڭ بريفينگى ءوتتى، دەپ حابارلايدى Dalanews.kz.
جۋرناليستەرگە دۇكەندە جانجالدىڭ باستالۋ ءساتى جازىلعان بەينەجازبا ۇسىنىلدى.
ءىىم-نىڭ ءبىرىنشى ورىنباسارى باۋىرجان الەنوۆتىڭ ايتۋىنشا، تەرگەۋ زاڭعا سايكەس جۇرگىزىلۋدە، ال وقيعا ورنىندا تۇسىرىلگەن ۆيدەو قىلمىستىق ءىس ماتەريالدارىنا قوسىلعان. پوليسيا بەينەجازباعا ەشقانداي مونتاج جاسالماعانىن راستادى. ۆيدەودا كۇدىكتىلەردىڭ سىرا مەن تەمەكى ساتىپ الۋ ءساتى جانە تولەم جاساعانى كورسەتىلگەن. بۇعان قوسا، الەنوۆ جانجال سىرانىڭ اقىسىن تولەمەگەننەن باستالدى دەگەن بولجامدى جوققا شىعاردى.
بەينەجازبانىڭ ەگجەي-تەگجەيىن ءىىم وكىلى سامات ايىسوۆ ءتۇسىندىرىپ بەردى. ول “قاماجاي” دۇكەنىنىڭ ىشكى جاعىندا ەكى، سىرتقى جاعىندا ءبىر كامەرا ورناتىلعانىن اتاپ ءوتتى.
“كۇدىكتى دۇكەنگە كىرىپ، ەكى بوتەلكە سىرا مەن ءتورت قوراپ تەمەكى ساتىپ الىپ، تولەم تۋرالى چەك كورسەتەدى. مارقۇمنىڭ اكەسى تەلەفونىنان تەكسەرگەندە، اقشانىڭ تۇسپەگەنىن بايقايدى، ءبىراق ءبىر مينۋتتان كەيىن ترانزاكسيانى راستايدى. كەيىن كۇدىكتى تاعى ءبىر بوتەلكە سىرا الىپ، 1000 تەڭگەنى قولما-قول تولەپ، شامامەن 500 تەڭگە قايتارىم الادى. ەر ادامدار اراسىندا قول قيمىلدارى ارقىلى دوستىق قارىم-قاتىناستى بىلدىرەتىن بەلگىلەر الماسقان، ەشقانداي جانجال بايقالماعان.
كەيىن كۇدىكتى دۇكەنگە قايتا كەلىپ، تەلەفونىن قۋاتتاۋعا قويۋدى سۇراپ، 4 مينۋتتان سوڭ تەلەفونىن الۋ ءۇشىن قايتا ورالادى”، – دەدى ول.
وسى ساتتە مارقۇم شەرزات سىرتقا شىعىپ كەتەدى. ال كەيىن قارجاۋباي نۇرىموۆ دالادان شۋ ەستىپ، دۇكەننىڭ كىرەبەرىسىنە شىعادى. سول جەردە ونىڭ ۇلى مەن كۇدىكتى تۇرعانى كورىنەدى.
كادرلاردا اكەسىنىڭ كۇدىكتىنى ۇستاپ تۇرعانى جانە ۇلىنا ەسكەرتۋ جاساپ جاتقان ءساتى بايقالادى. كەيىن ول كۇدىكتىگە بەتىن جۋۋ ءۇشىن بوتەلكەمەن سۋ الىپ شىعادى.
“كەيىن ەكىنشى كۇدىكتى كەلىپ، مارقۇمنىڭ اكەسىمەن داۋلاسىپ، تەلەفونىن كورسەتكەن”، – دەلىنگەن بەينەجازبادا.
ءىىم وكىلى سامات ايىسوۆتىڭ ايتۋىنشا، شەرزات بولاتتىڭ اكەسى دۇكەنگە كۇدىكتىلەرمەن بىرگە كىرىپ، قولىنا بەلگىسىز زات ۇستاپ شىعادى. ول كۇدىكتىلەردىڭ ارتىنان بارماق بولعاندا، ۇلى ونى توقتاتادى.
“جازبادا توپتاعى قىزداردىڭ ءبىرى ەر ادامداردى اجىراتۋعا تىرىسىپ، بىرەۋىن شەتكە الىپ كەتكەنى انىق كورىنەدى. سونىمەن قاتار، ۆيدەوجازبادان قىزداردىڭ بەلسەندى ارەكەتتەرى بايقالمايدى”، – دەلىنگەن ءىىم مالىمەتىندە.
ودان كەيىنگى وقيعالار كادر سىرتىندا قالعان. ءىىم وكىلدەرى بۇل بويىنشا تەرگەۋ جۇرگىزىلىپ جاتقانىن جانە وقيعاعا قاتىسۋشىلاردىڭ بارلىعى انىقتالعانىن ايتتى.
