Jańa Konstıtýsıa boıynsha 15 naýryzǵa belgilengen respýblıkalyq referendýmǵa ketetin shyǵyn aldyńǵysynan da kóp bolýy yqtımal, dep habarlaıdy Dala News.

Qarjy vıse-mınıstri Dáýren Temirbekovtiń aıtýynsha, naqty soma ázirge belgisiz, sebebi Ortalyq saılaý komısıasynan búdjettik ótinim áli túspegen.

«Soma áli belgisiz. Biz Ortalyq saılaý komısıasynan búdjettik ótinimdi kútip otyrmyz. Meniń boljamymsha, ótken referendýmǵa jumsalǵan 15,5 mlrd teńgeden kóp bolady. Sebebi halyq sany artty, ınflásıa bar. Halyq sany kóbeıgen soń saılaý ýchaskeleri de kóbeıedi. Soǵan sáıkes shyǵyn kólemi de artady dep kútip otyrmyz», – dedi ol Senat kýlýarynda.

Vıse-mınıstrdiń sózinshe, referendýmnyń naqty qansha qarjy talap etetini eki kún ishinde belgili bolady. Qarjylandyrý Úkimet rezervi esebinen júzege asyrylady.

Aıta keteıik, buǵan deıin ótken referendýmǵa 15,5 mlrd teńge jumsalǵan. Al bul jolǵy shyǵyn kólemi halyq sanynyń ósýi men ınflásıalyq qysymǵa baılanysty artýy múmkin.