Jalpy otyrysta mınıstr «Qazaqstan Respýblıkasynyń keıbir zańnamalyq aktilerine aqparat jáne komýnıkasıalar máseleleri boıynsha ózgerister men tolyqtyrýlar engizý týraly» atty zań jobasyn tanystyrdy.
Keıin halyq qalaýlysy Álıa Saparova elimizdegi azamattardyń biraz bóligi «sur» tarelkalardy paıdalanyp, otandyq BAQ taratqan aqparattardan tys qalyp otyrǵanyn atap ótti. Osy oraıda ol Dáýren Abaevtan atalǵan salaǵa qalaı baqylaý júrgizetinin surady.
«Teleradıo habarlaryn taratý týraly» zań jobasy boıynsha atalǵan salada lısenzıa men óziniń spýtnıktik júıesi joq, operatorlarǵa tyıym salý normasy usynylyp otyr. Atalǵan normany qoldaı otyryp, bir nárseni anyqtaǵym keledi. Iaǵnı, atalǵan norma «sur» spýtnıktik tarelkasy bar azamattarǵa qalaı áser etedi? Atalǵan salany qalaı baqylaýǵa almaqsyzdar?» – dedi depýtat.
Osy oraıda QR Aqparat jáne komýnıkasıalar mınıstri atalǵan sala aqparattyq qaýipsizdik úshin óte mańyzdy ekenin atap ótti.
«Bul másele elimizdiń aqparattyq qaýipsizdigine qatysty. Qazirgi kezde 600 myńǵa tarta otbasy «sur» tarelkalardy paıdalanýda. Bul jerde jady kartasy paıdalanylady. Al onda qazaqstandyq telearnalar ornatylmaǵan. Osy oraıda shamamen 1,5 mıllıon adam Qazaqstannyń aqparattyq keńistiginen tys qalyp otyr, ıaǵnı olar qazaqstandyq telearnalardy qaramaıdy jáne elimizde ne bolyp jatqanyn bilmeıdi», – dedi mınıstr.
Abaevtyń aıtýynsha, el turǵyndary «sur» tarelkalardy paıdalanýdy jalǵastyrýda. Sebebi, bul sala elimizde zań júzinde rettelmegen.
«Sondyqtan bul máseleni ózekti dep bilemiz. Osy qurylǵylardy paıdalanýdy adamdar jalǵastyra beredi. Bul turǵyda tutynýshylarǵa yqpal etýdiń eshqandaı sharalary bizde qarastyrylmaǵan. Alaıda biz osy kartalardy taratyp júrgen adamdyrdy quqyqtyq keńistikke shyǵarýdamyz. Olar shynymen de Qazaqstannyń quqyqtyq keńistiginen tys qalyp otyr. Elektrondy tólemder arqyly tólengen aqsha basqa elderge ketip – jatyr», – dep túıindedi sózin mınıstr.
Sondaı-aq, aqparat jáne komýnıkasıalar mınıstri Dáýren Abaevtyń aıtýynsha, buqaralyq aqparat quraldarynyń suraýyna jaýap bermeıtin sheneýnikterdiń jalaqysy tómendetiletin bolady.
«Olardyń qyzmetiniń tıimdiligin baǵalaý bonýstyq-baldyq júıege keltirilýde. Sol sebepti, eger ol jaýap bermese, tıisinshe, reıtıńi quldyraıdy, nátıjesinde, eńbekaqysy da kemıdi. Memorgandardyń qyzmeti tıimdiliginiń ólshem-krıterııleriniń biri – BAQ-pen jumys bolady. Memlekettik qyzmetshilerge arnaıy KPI, tıimdilik kórsetkishteri belgilenedi, ol óz jumysynda soǵan sáıkes kelýge mindettenedi. Basshylar onyń KPI kórsetkishterine jaýap beretin-bermeıtinin qarap otyrady. Jaýap bermese, jumystan bosata alady», – dedi Dáýren Abaev.
Zań jobasynyń negizgi baǵyttary
Atalǵan zań jobasy buqaralyq aqparat quraldary, teleradıo habarlaryn taratý, aqparattandyrý jáne baılanys, aqparattyq qaýipsizdik salasyndaǵy qoǵamdyq qatynastardy quqyqtyq retteýdi qamtamasyz etýge baǵyttalǵan. Buqaralyq aqparat quraldary men komýnıkasıalar salasyndaǵy ózgerister birneshe baǵyttarǵa arnalǵan.
Birinshiden, aqparat salasynda azamattardyń quqyqtaryn:
- sýbtıtrleýdi nemese sýrdoaýdarmany keńinen qoldaný arqyly múmkindigi shekteýli adamdardyń aqparatqa qoljetimdiligine quqyqtardy paıdalaný múmkindigin keńeıtý;
- «balanyń jasyna sáıkes keletin aqparat» degen uǵymdy zańnamalyq turǵydan bekitý;
- balanyń beınesin jáne derbes derekterin balanyń óziniń nemese onyń zańdy ókilderiniń kelisiminsiz paıdalanýdy shekteý jónindegi normalardy engizý jolymen qamtamasyz etý.
2) BAQ qyzmeti úshin:
- bolmashy buzýshylyqtar boıynsha BAQ qyzmetin toqtata turý jáne taralymdy tárkileý túrinde ákimshilik jazalaý sharalaryn alyp tastaý;
- olardyń aýyzsha jáne jazbasha suraý salýlary boıynsha BAQ aqparat usyný prosesin retke keltirý;
- BAQ-pen jumys isteýdi júzege asyratyn ýákiletti tulǵalardyń nemese bólimshelerdiń mártebesi men fýnksıalaryn aıqyndaý;
- baspasóz basylymdarynyń ýákiletti organǵa mindetti danany elektrondyq túrde ǵana usynýy jolymen jaǵdaı jasaý.
3) Otandyq televızıa jáne jarnama naryqtaryn:
- spýtnıktik teleradıo habarlaryn taratý operatorlarynyń qabyldaǵysh qondyrǵylaryn taratýmen aınalysatyn tulǵalardy teleradıo habarlaryn taratý sýbektileri retinde zańnamalyq turǵydan aıqyndaý;
- memlekettik organdar men uıymdarda jarıa túrde kórsetý úshin tek qana otandyq tele-radıoarnalaryn taratý jónindegi talaptardy engizý;
- memlekettik tildegi jarnamany teń mólsherde bólý jónindegi normalardy naqtylaý jolymen damytý.
4) Komýnıkasıany:
- memlekettik-jekeshelik áriptestik rásimin jetildirý arqyly aqparattandyrýdyń servıstik modeli boıynsha kórsetiletin qyzmetterdi alý;
- memlekettik organdardyń aqparattyq júıelerine qoıylatyn talaptardy qaıta qaraý, aqparattyq qaýipsizdik talaptaryna sáıkestikke mindetti synaq rásimine jatatyn obektilerdi anyqtaý jolymen damytý.
Májilis depýtattary osy otyrysta Qazaqstan Respýblıkasynyń keıbir zańnamalyq aktilerine ishki ister organdarynyń qyzmetin jetildirý máseleleri boıynsha ózgerister men tolyqtyrýlar engizý týraly Qazaqstan Respýblıkasy zańynyń jobasy, «Advokattyq qyzmet jáne zań kómegi týraly» zańnyń jobasyn ilespe túzetýrlerimen jumysqa alyp, beıindi komıtetterge qorytyndy ázirleý merzimderin belgiledi.
