Assalaýmaǵaleıkým, Qazaq eli! Muhıt asqan qara balańyz taǵy da sizdermen baılanysqa shyǵyp tur. Bul joly qos qorjynymdy teń ustap, qoldaý bildirgen Genadaı balalaryńyzdyń erligin aıtýǵa shyǵyp turmyn. Árıne, bórkimizdi atyp, súıinshi suramadyń dep sókpeńizder. Jeńistiń shashýy shashylmasa da, jeńisten kem túspeıtin kezdesý boldy, jeńiske bergisiz erlik kórsetken Gennadıı balalaryńyzǵa rıza boldym. Jat jerde júrip, eldiń namysyn qulatpaǵan uldaryńyzǵa menen góri sizder erekshe qurmet kórsetip jatqan bolarsyzdar. Álbette, solaı bolýǵa tıis. Maıqudyqtyń maıtalmany qandaı qurmetke de laıyqty, qalaı maqtasa da bolady. Sonymen, alǵashqy amandasý sózimizdi túıindep, negizgi bokstyń qalaı ótkenine toqtalaıyn.
Gımn shalqyǵan kez! Ǵasyr jekpe-jegi bastalatyn ýaqyt ta jetti. Gennadıı men Alvarestiń shaıqasynyń aldyndaǵy kezdesýlerge toqtalyp, sizderdiń ýaqyttaryńyzdy almaıyn. Biz de, siz de, kúlli álem kútken bokstan bir-aq bastaıyn.
Sonymen, eki myqtynyń judyryqtasýy bastalmas buryn, eki eldiń memlekettik Gımni shyrqaldy. Qudaı-aý, qandaı ǵajap deseńizshi?! Táýelsiz Qazaq eliniń Gımni muhıttyń arǵy betinen shyrqalǵany. Buǵan deıin de talaı dúbirli doda da Kók baıraǵymyz qalyqtap, án uranymyz shyrqaldy emes pe. Al, búgingi Gımin múlde erekshe desem artyq aıtpaǵanym. Talantymen talaıdy tańǵaldyryp júrgen Gennadıı Golovkınniń qurmetine oryndalǵan Gımnniń «T*mobile» keshenniń ishin tamasha bir kúıge bólegendeı áser qaldyrdy. Kóńil tolqytatyn Gımnniń daýysyn estigen bizdiń kózimizge ystyq jas irkilgendeı áser qaldyrdy. Qazaqtyń shapanyn kıip, ortaǵa symdaı tartylǵan qazaqtyń symbatty jigiti shyǵyp urandaǵanda tóbemiz bir eli kókke jetkendeı boldyq. Ár tustan, kók kıimdi kıgen qazaq jankúıerleriniń de daýysy shyǵyp, eliniń Gımnin qosyla shyrqaǵanyn jıyrma myń jankúıerdiń ishinen estip te turdym. Bul biz úshin qýanyshty jaıt. Shirkin, sońǵy raýndtan keıin dál osylaı shyrqalyp jatsa degen tilegimizdi ishteı qaıtalap turdyq. Sonymen eki memlekettiń Gımni oryndalyp, sońynan álemge aty áıgili Maıkl Baferdiń daýysy sańq ete qaldy. Ortaǵa boksshylardy shaqyrdy. Sharshy alańǵa jetkenshe ataq-dańtaryn tanystyryp, qos myqtynyń esimderi aıtyldy. Qazaqtyń oıýly shapanyn jamylyp, Gennadıı Golovkın men qoldaýshylary shubyrtyp, Saýl Alvareste jetti. Sharshy alańnyń ár qaptalyna baryp, oınaqshyp júrgen Saýl jankúıerlerine qurmet kórsetip júr. Tyǵyrshyqtaı jumyr denesimen babynda ekeni alystan-aq baıqalady. Bizdiń Gena da qalysar emes. Onyń da jaqtaýshylary jeterlik. Elden kelgen jankúıerlerdi qospaǵanda Genany jaqsy kóretin ózge de jankúıerler esimin aıǵaılap, dýyldatyp qoıa berdi.
1-raýnd. Gena ádettegideı qarsylasyn tyqsyrtyp sharshy alańda qýyp júr. Aıtarlyqtaı joıqyn soqqy jumsamasa da, djep soqqylaryn baǵyttap saq qımyldaýda. Alvareste birden berile qoıatyn osaldar sanatynan emes ekeni anyq. Genanyń soqysynan sytylyp shyǵyp, tıgizetin emes. Áıtse de, bizdiń jigittiń úsh soqqysy Saýldiń betine tıdi. Meksıkalyq jigitte qarap qalmady. Raýndtyń sońyna qaraı ol da qarymta qaıtaryp, bir-eki soqqysyn darytyp úlgerdi. Jalpy, birinshi raýnd barlaýmen bolatynyn eskersek, eki boksshy da sol úrdisten taıqymady jáne óte saq qımyldady. Kóbine qorǵanysqa kóńil bólip, bir-biriniń soqqysyna túsip qalmaýdy oılady. Meniń oıymsha birinshi raýnd teń dárejede ótti jáne solaı dep baǵa beremin.
2-raýnd. Nege ekeni belgisiz Genanyń qarqyny báseńdeý. Buǵan deıin bolǵan kezdesýlerinde qarsylastaryn tómpeshtep alatyn Gena bul joly ondaı qadamǵa barmady. Kersinshe, Alvares qaýipti soqqylarymen shabýyldap, bir-eki soqqysyn da ótkizip úlgerdi. Al otandasymyz bolsa, kóbirek qorǵanysqa kóńil bólýde. Tipti barǵan saıyn meksıkalyq boksshy qarqyn alyp bara jatqandaı. Júregimiz aýzymyzǵa tyǵylyp, qarsy soqqyǵa tap kelip qalmasa eken dep tilep otyrmyz. Á, mine, ekinshi raýnd ta aıaqtaldy. Qaýipti sátten amanbyz. Shamamen teń aıaqtaldy dep esepteımin.
3-raýnd. Taqym qysyp, janymdy shúberekke túıip otyrmyn. Gena bul joly tym sylbyr. Qorǵanysy da syr berip jatyr. Alvarestiń birneshe aýyr soqqysy ótip ketti. Qudaı ońdaǵanda qulap qalýdan amanbyz. Osy ýaqytta qarsylasyn sharshy alańda bir aýnatyp alatyn Genanyń burynǵydaı qarqynyn baıqaı almaı otyrmyn. Kersinshe qarqynyna-qarqyn qosqan Alvares basymdyq tanytýda. Oń qolymen baǵyttaǵan soqqylary qorǵanysty buzyp jatqandaı kórinedi. Qalaı bolǵanda da jastyń aty jas, aıaǵymen de shıraq qımyldap, judyryǵyn da jyldam jumsap, upaı enshileýde. Keıbir soqqylaryna tipti kóz ilespeı, qaı jerinen sart ete qalǵanyn da baıqaı almaýdamyz. Óıtkeni óte jyldam, tym shapshań. Boksshy úshin eń kerektisi de osy shyǵar. Ashyq tusty tez baıqap, sart etkizý. Sonymen úshinshi raýndta aıaqtaldy. Bul joly bir basy basym bolsa da, Alvarestiń qanjyǵasynda ketti dep oılaımyn.
4-Raýnd. Meniń kózim ózine-ózi senbeı otyr. Buǵan deıin qarsylasyna jarq etip tıetin Genanyń soqqysyn izdeıtindeı. Baıaǵy kombınasıa, shapshańdyq, ógizdi qulatatyn joıqyn soqqynyń barlyǵy tórtinshi raýndta joq. Alvares bolsa ústi-ústine tópeletip soqqylap júr. Gena tek qorǵanýda. Qorǵanystyń ózi kóńilge medet degenimiz bolmasa, aragidik buzylyp qalyp, qarsy soqqylardy betine tıgizip alýda. Keı tustar da Saýldiń baýyr tustan jumsalǵan judyryǵy Genany teńseltip jiberedi. Qýanyshqa oraı qulap qalmaı, sharshy alańda júr. Árıne, meni Saýlǵa jaqtasyp otyr deýlerińiz múmkin. Biraq myna boks men úshin qıynǵa soǵýda. Dál osy kezdesýdi Genanyń enshisine jazyp jatsa, onda men sizderden keshirim suraımyn. Dál qazirgi raýnd Saýldiń basymdyǵy baıqalady. Sport bolǵasyn naqty aqparat pen shyndyqty aıtý kerek. Áıtpese, sonaý qazaq aýylynan Genaǵa jaqtaspaǵanda Meksıkanyń sary shegiriniń shash baýyn kóterip keldi deısizder me. Saýl dál soqqan soqqylarymen kimdi bolsa da eriksiz óziniń jetegine ertip ketetindeı. Sonymen bul raýndty da men Saýlǵa bergendi jón sanap otyrmyn. Árıne, bokstyń taǵdyryn sheshetin, jeńisti anyqtaıtyn men emes. Men tek, ózderińiz sekildi jankúıermin, eki myqtynyń arasyndaǵy shaıqas jaıly aqparat taratýǵa elden kelgen jalǵyz jýrnalıspin. Al, upaıdy esepteý tóreshilerdiń enshisinde.
5-raýnd. Bul raýndta Genanyń enshisine jazýǵa bolady. Saýldi buryshqa tyǵyp alyp sabady. Soqqylary da darydy. Osy tusta aıta keteıin, Gena ádette buryshqa tyǵyp qarsylasyn sabaǵan tusta, birneshe serıaly soqqy jumsap, ásirese baýyr tustan soǵatyn ádemi bir soqqylary bar edi. Bul joly ony biz baıqaı almaı otyrmyz. Arasynda sol ádisine salyp qoıady. Degenmen, álsiz. Tipti Saýliń oıyn kórip júrgendeı. Genanyń soqqylary tıip jatsa, basyn shaıqap, bar bolǵany osy ma, maǵan esh áser etpedi degendeı ıshara tanytyp júr.
6-raýnd. Gennadıı óziniń babyna endi kele jatqandaı. Shıyrshyq atyp, atoılap shapty. Birneshe serıaly soqqylaryn jumsap, Saýldi ábigerge túsirdi. Ógiz qulatatyn bir-eki soqqysy dál tıdi. Biraq, Saýl da myqty eken. Qatty tıse de tizerlegen joq.
7-raýnd. Bul raýndty da Genaǵa beremin. Saýldiń aldyndaǵy batyrlyǵy báseńdep qalǵandaı. Júzinde bir qorqynysh paıda boldy. Bir qaraǵanda sharshap ta qalǵandaı. Kezdesýdiń sońyna qaraı Gennadıı jigerlene bastap, óziniń mánerine kóshti. Árıne, Saýldiń saǵy múldem synyp ketti deýge kelmeıdi. Kezdesýdiń taǵdyry bul raýndpen sheshilip ketpesi anyq. Alda áli raýndtar bar. Ol da jaqsy babyn da, ábden tolyqsyǵan ýaqyty. Onyń ústine Genany óte jiti zerttep, tyńǵylyqty daıyndalǵany kórinip tur.
8-raýnd. Ómir degen alma-kezek emes pe. Bul raýndtyń basyn Saýl belsendilikpen bastady. Az da bolsa tynyǵyp alǵasyn ba, alǵashqy jumsaǵan judyryqtary Genaǵa ótip ketti. Biraq, bizdiń Gena da judyryqqa-judyryqpen jaýap qaıtyp, osaldyq tanytpady. Ásirese alys qashyqtyqtan jasaǵan djepteri dál tıip jatty. Taktıkaǵa da kóńil bólip, jaqyn shaıqasqa barmaı, qarymta qaıtaryp, umtylǵan tusta jaqsy kútip aldy. Bul Genanyń burynǵy ádisteriniń biri bolatyn. Gena raýndttyń sońǵy sekýndtaryn jaqsy aıaqtap, joıqyn bolmasa da, dál baǵyttaǵan judyryǵy dittegen jerine tıdi.
9-raýnd. Bul raýnd ta óte qyzyqty boldy. Shym-shytyryq soqqylardy jumsap, bir-birin tómpeshteı jóneldi. Genanyń búrkitshe búrip alatyn kezi osy raýndta oryn aldy. Anaý jigit te tabany jerge jelimdelip qalǵan ba, aýyr soqqyny qansha qabyldasa da qulamaı qaldy. Onyń ústine kóptegen mamandar men jankúıerler Gena Alvaresti osy toǵyzynshy raýndta qulatady degen pikirler bolǵan. Sol aıtqandary dál kelmese de, sál ǵana qaldy jáne rasynda da osy raýndta Gena atoı saldy.
10-raýnd. Kezdesýdiń kómbesi kóringen saıyn boksshylar qarqyn alyp keledi. Tipti osy raýndta bir birine baǵyttaǵan soqqylaryn men qabyldaǵandaı boldym. Eseńgirep, mıym aýyp qalǵandaı kúı keshtim. Shym-shytyryq jumsalǵan judyryqqa kóz ilespeıdi. Bir-birine aýyr soqqylarmen jaýap qaıtaryp, beriletin emes. Qaı jeńgeniń meniki degendeı, soqqylar dál tıse aıyzy qanǵan jankúıerler ornynan bir turyp otyr. Men de Genajan, keziń keldi, ur, ura tús, seniń qolyńnan keledi, talaı myqtynyń jigerin qum ettiń emes pe degen sózdi ishteı kúbirleı jóneldim. Biraq, eki myqty da bir-birin qulata almady. Menińshe, bul raýnd teń aıaqtaldy desem, eshkim daýlasa qoımas. Alda naǵyz chempıondardyń raýndty kútip tur jáne ol da bastaldy.
11-raýnd. Biz kútken shaıqas bul joly bolmady. Eki boksshymyz da sharshap qalǵandaı kórindi. Kim biledi, múmkin, kúshterin sońǵy raýndqa saqtap júr me, áıteýir, asa tartysty bolmady. Joıqyn soqqylar jumsamady. Bir sózben aıtqanda teń dárejede ótkizdi.
12-raýnd. Qushaqtasýdan bastalǵan raýnd sartyldaǵan soqylarmen jalǵasyp ketti. Gong berilgen bette Saýl birneshe aýyr soqqylardy baǵyttap úlgerdi. Dál osy tusta, júregimiz aýzymyzǵa tyǵylyp Gena, shyda, qulama, sen de soq dep taqym qystyq. Myqtyny – myqty deý kerek. Talaı shaıqasta ysylǵan Gennadıı soqqysyna soqqymen jaýap berip, ashyq aıqasqa shyqty. Naǵyz chempıondardyń shaıqasy endi bastalǵandaı. Jankúıerler de dýyldap qoıa berdi. Bul raýnd kóp nárseni sheshedi. Tóreshilerdiń buǵan deıingi raýndta qandaı baǵa bergenin bilmeımin. Biraq, sońǵy raýnd chempıondyqtyń taǵdyry sheshiletin kez. Munda soqqy men qosa, belsendilik, dáldik esepteletinin esten shyǵarmaýymyz kerek. Ony menen góri boksshylar jaqsy biledi. Soǵan qaraı ekeýi de tynbaı qol sermep jatyr. Mine, 12 raýndtyń bitýine 40 sekýnd qaldy. Gena da qarqynǵa basty. Soqqylap jatyr. Saýlda qalysar emes. Dáldik jaǵynan Genanyń basymdyǵy baıqalady. Iá, mine, 5 sekýnd, 4 sekýnd, 3 sekýnd, 2 sekýnd bitti. Áı, jaraısyń! Jasyń 35-ke kelgende jap-jas Meksıkanyń qabylanymen arystansha aıqastyń. Shyn shaıqasty kórsettiń. Ol seniń myqtylyǵyń. Sońǵy sekýnqa deıin soqqylaryńdy qarsha borattyń. Menińshe tóreshiler teń dep shesher. Áıtse de, bir soqqy bolsa da Genanyń enshisine jazylý kerek, bul raýnd. Biraq, sońǵy tolyq sheshimdi tosaıyq.
TÚIİN:
Uly shaıqastyń sheshýshi kezi de kelip jetti. Men buǵan deıingi reportajdarymda aıtqan bolatynmyn. Eger eki boksshy teń túsip jatsa tańǵalmańyzdar dep. Ekeýi de naǵyz batyrǵa laıyq boks keshin syılady. Iá, tóreshi kimniń qolyn kóteredi. Habarlaý bastaldy. Áp, bárekeldi! Ekeýi teń tústi, teń sheshim shyǵardy. Mine, meniń aıtqanym dál keldi. Árıne, buǵan biz qýanýymyz kerek. Jeńilis joq, alda áli shaıqas bar. Qýanyshymyzǵa oraı bizdiń Gennadıı óziniń chempıondyq ataǵyn qorǵap qaldy. Basymyz jerge qaraǵan joq. Táýbe, eńsemiz tik. Laıym solaı bolǵaı! Meksıkalyq sary shegir qarymta qaıtaram deıdi. Oǵan bizdiń myqty da tastúıin daıynmyn dep jatyr. Naǵyz chempıon sol kezde anyqtalar. Múmkin, úshinshi kezdesýde... Qalaı bolsa da, alda áli shaıqas bar ekenin kókeıge túrtip alaıyq. Bul joly nege anyqtalmady degenge kelsek, onyń birneshe sebebi bar. Ony men kelesi jazbama qaldyraıyn. Gena men Saýldiń shaıqasyndaı chempıondyqty jumbaq kúıinde qaldyrǵandaı tamsandyryp qana aıaqtaıyn. Al, aǵaıyn, men osymen Las-Vegastaǵy reportajymdy ýaqytsha doǵaraıyn. Elge barǵasyn ýáde etken sebepterdi jazatyn bolamyn. Amandyqta júzdeskenshe!
Nesip JÚNİSBAIULY, AQSH, Las-Vegas.
