Qazaqstanda respýblikalyq mańyzy bar avtojoldardyń nebári 12 paiyzy ǵana qaýipsizdik talaptaryna tolyq sai keledi. Al jol-kólik oqiǵalarynyń basym bóligi – shamamen 85 paiyzy eldi mekender aýmaǵynda tirkeledi. Bul týraly QR Ishki ister ministri Erjan Sádenov málimdedi, dep habarlaidy Dalanews.kz.
"Qazirgi tańda eni tórt jáne odan da kóp jolaqtan turatyn 6 myń shaqyrymnan astam avtojol salý qajet. Ásirese eldi mekender arqyly ótetin jol bólikterindegi qaýipsizdik máselesi ótkir tur. Osy aimaqtarda 59 jerasty jáne 119 jerústi jaiaý júrginshiler ótkeli, shamamen 600 baǵdarsham, myń shaqyrymnan astam jaiaý júrginshiler qorshaýy, 15 myń shaqyrym jaryqtandyrý jáne 70 myń shaqyrym trotýar salý josparlanyp otyr. Budan bólek, 2 800 shaqyrym velosiped joly salynady", – dedi Sádenov.
Ministrdiń aitýynsha, bul máseleler ótken aida Úkimet otyrysynda qaralyp, naqty tapsyrmalar berilip, oryndalý merzimi bekitilgen.
Sondai-aq Erjan Sádenov patrýldik qyzmette shtat tapshylyǵy bar ekenin atap ótti. Onyń sózinshe, dál osy qyzmet jol qozǵalysy qaýipsizdigin jáne qoǵamdyq tártipti qamtamasyz etedi, alaida halyq pen kólik sanynyń artýyna bailanysty kadrlar jetispeidi.
"Qosymsha 8 200 qyzmetker qajet. Qazir bar bolǵany 13 myń baǵyttyń úshten biri ǵana qamtylyp otyr – 4,3 myń marshrýt. Ákimderge qosymsha qarjy kózderin tabý tapsyryldy", – dedi IIM basshysy.
