Básekelestikti qorǵaý jáne damytý agenttiginiń (BQDA) tergep-tekserýi nátijesinde “QTJ-Júk tasymaly” JShS men HILL Corporation JShS arasynda básekelestikke qarsy kelisim jasalǵany belgili boldy. Bul kompaniia burynǵy Bas prokýror Qairat Kojamjarovtyń baýyryna tiesili, dep habarlaidy Dalanews.kz.
Tergeý barysynda “QTJ-Júk tasymaly” lokomotivterge arnalǵan motor mailaryn satyp alý kezinde básekege qabiletti jetkizýshilerdi elemei, arnaiy sharttar engizgeni anyqtaldy. Bul talaptar basqa kompaniialardyń tenderge qatysýyna kedergi keltirip, bastapqydan-aq HILL Corporation-nyń múddesine jumys isteýge baǵyttalǵan.
“Agenttiktiń qorytyndylarymen kelispegen HILL Corporation sotqa júgingen. Alaida 2025 jyly 11 naýryzda Joǵarǵy sot bul isti qarap, jergilikti sottardyń sheshimin kúshinde qaldyrdy. Osylaisha, antimonopoliialyq organ júrgizgen tergeýdiń zańdy ekeni rastaldy”, — dedi agenttik.
Lokomotivterge arnalǵan motor mailaryn jetkizý salasynda anyqtalǵan básekelestikke qarsy kelisimniń jalpy somasy 12 milliard teńgeden asty.
Aita keteiik, Dýlat Qojamjarov – buryn Bas prokýror ári Senat depýtaty bolǵan Qairat Qojamjarovtyń týǵan baýyry.
Al kásipker ielik etetin HILL Corporation – “High industrial lubricants & liquids corporation (HILL)” JShS qurylymyna kiretin kompaniia.
Eske salaiyq, buǵan deiin Bas prokýratýra janyndaǵy Aktivterdi qaitarý komiteti biznesmen Dýlat Qojamjarovty memleketke zańsyz ótken aktivterdi qaitarý týraly zań aiasyndaǵy arnaiy reestrge engizgeni týraly jazǵan edik.
Atalǵan reestrdegi adamdardyń aty-jónderi qoǵamǵa jariia etilmeidi, sebebi bilik bul tizimdegi tulǵalardyń bedelin qorǵaýdy maqsat etip otyr.
Dýlat Qojamjarovtyń ókilderi bul sheshimmen kelispei, Bas prokýrorǵa shaǵym túsirgen jáne Aktivterdi qaitarý jónindegi komissiianyń sheshimin joiýdy talap etken. Alaida, olardyń shaǵymy qanaǵattandyrylmai, komissiia áreketiniń zańdylyǵy rastaldy.
Forbes Kazakhstan basylymynyń málimetinshe, Dýlat Qojamjarovtyń bailyǵy 110 million dollarǵa baǵalanyp, eldegi eń aýqatty biznesmender reitinginde 57-orynda tur. Ol – Shymkent qalasynda ornalasqan iri óndiristik kesheni bar Hill Corporation kompaniiasynyń iesi. Bul kompaniia túrli tehnikalyq mailar men jaǵarmai ónimderin óndirýmen ainalysady.
