باسەكەلەستىكتى قورعاۋ جانە دامىتۋ اگەنتتىگىنىڭ (بقدا) تەرگەپ-تەكسەرۋى ناتيجەسىندە “قتج-جۇك تاسىمالى” ج ش س مەن HILL Corporation ج ش س اراسىندا باسەكەلەستىككە قارسى كەلىسىم جاسالعانى بەلگىلى بولدى. بۇل كومپانيا بۇرىنعى باس پروكۋرور قايرات كوجامجاروۆتىڭ باۋىرىنا تيەسىلى، دەپ حابارلايدى Dalanews.kz.
تەرگەۋ بارىسىندا “قتج-جۇك تاسىمالى” لوكوموتيۆتەرگە ارنالعان موتور مايلارىن ساتىپ الۋ كەزىندە باسەكەگە قابىلەتتى جەتكىزۋشىلەردى ەلەمەي، ارنايى شارتتار ەنگىزگەنى انىقتالدى. بۇل تالاپتار باسقا كومپانيالاردىڭ تەندەرگە قاتىسۋىنا كەدەرگى كەلتىرىپ، باستاپقىدان-اق HILL Corporation-نىڭ مۇددەسىنە جۇمىس ىستەۋگە باعىتتالعان.
“اگەنتتىكتىڭ قورىتىندىلارىمەن كەلىسپەگەن HILL Corporation سوتقا جۇگىنگەن. الايدا 2025 جىلى 11 ناۋرىزدا جوعارعى سوت بۇل ءىستى قاراپ، جەرگىلىكتى سوتتاردىڭ شەشىمىن كۇشىندە قالدىردى. وسىلايشا، انتيمونوپوليالىق ورگان جۇرگىزگەن تەرگەۋدىڭ زاڭدى ەكەنى راستالدى”، — دەدى اگەنتتىك.
لوكوموتيۆتەرگە ارنالعان موتور مايلارىن جەتكىزۋ سالاسىندا انىقتالعان باسەكەلەستىككە قارسى كەلىسىمنىڭ جالپى سوماسى 12 ميلليارد تەڭگەدەن استى.
ايتا كەتەيىك، دۋلات قوجامجاروۆ – بۇرىن باس پروكۋرور ءارى سەنات دەپۋتاتى بولعان قايرات قوجامجاروۆتىڭ تۋعان باۋىرى.
ال كاسىپكەر يەلىك ەتەتىن HILL Corporation – “High industrial lubricants & liquids corporation (HILL)” ج ش س قۇرىلىمىنا كىرەتىن كومپانيا.
ەسكە سالايىق، بۇعان دەيىن باس پروكۋراتۋرا جانىنداعى اكتيۆتەردى قايتارۋ كوميتەتى بيزنەسمەن دۋلات قوجامجاروۆتى مەملەكەتكە زاڭسىز وتكەن اكتيۆتەردى قايتارۋ تۋرالى زاڭ اياسىنداعى ارنايى رەەسترگە ەنگىزگەنى تۋرالى جازعان ەدىك.
اتالعان رەەستردەگى ادامداردىڭ اتى-جوندەرى قوعامعا جاريا ەتىلمەيدى، سەبەبى بيلىك بۇل تىزىمدەگى تۇلعالاردىڭ بەدەلىن قورعاۋدى ماقسات ەتىپ وتىر.
دۋلات قوجامجاروۆتىڭ وكىلدەرى بۇل شەشىممەن كەلىسپەي، باس پروكۋرورعا شاعىم تۇسىرگەن جانە اكتيۆتەردى قايتارۋ جونىندەگى كوميسسيانىڭ شەشىمىن جويۋدى تالاپ ەتكەن. الايدا، ولاردىڭ شاعىمى قاناعاتتاندىرىلماي، كوميسسيا ارەكەتىنىڭ زاڭدىلىعى راستالدى.
Forbes Kazakhstan باسىلىمىنىڭ مالىمەتىنشە، دۋلات قوجامجاروۆتىڭ بايلىعى 110 ميلليون دوللارعا باعالانىپ، ەلدەگى ەڭ اۋقاتتى بيزنەسمەندەر رەيتينگىندە 57-ورىندا تۇر. ول – شىمكەنت قالاسىندا ورنالاسقان ءىرى وندىرىستىك كەشەنى بار Hill Corporation كومپانياسىنىڭ يەسى. بۇل كومپانيا ءتۇرلى تەحنيكالىق مايلار مەن جاعارماي ونىمدەرىن وندىرۋمەن اينالىسادى.
