Premer- ministrdiń orynbasary Qanat Bozymbaev Aqtóbe oblysyndaǵy Belqopa aýylyna jaqyn mańda bolǵan jol- kólik oqiǵasynyń sebepterin tergeý jónindegi Úkimettik komissiia múshelerine tapsyrmalar berdi dep habarlaidy Dalanews.kz.QR Úkimetiniń baspasóz qyzmetine silteme jasap.
Atap aitqanda, Bozymbaev Densaýlyq saqtaý ministrligine tasymaldaýǵa jatatyn barlyq zardap shekkenderdi qajetti em alýy úshin sanitarlyq aviatsiiamen Astana qalasyna jetkizýdi uiymdastyrýdy tapsyrdy.
Eńbek ministrligi men Aqtóbe oblysynyń ákimine qaza tapqandardyń otbasylaryna barlyq qajetti materialdyq jáne psihologiialyq kómek kórsetýdi tapsyrdy.
Ishki ister ministrligi men Kólik ministrligine vitse-premer Samara – Shymkent trassasynyń qaýipsizdik deńgeiin arttyrý maqsatynda onyń jumys tártibine qatysty usynystar engizýdi tapsyrdy.
Eske salaiyq, sumdyq jol apaty 23 qazan kúni tańerteń Samara – Shymkent avtojolynda bolǵan. Jol-kólik oqiǵasy kezinde DAF júk kóligi men jolaýshylar mingen «GAZel» soqtyǵysqan. Aldyn ala málimetter boiynsha, júk kóligi qarsy baǵytqa shyǵyp ketken. Oqiǵa ornynda eki júrgizýshi men on jolaýshy qaza tapqan. Qaitys bolǵandardyń arasynda – ata-anasymen birge eki bala bar.
Alty adam Aqtóbe oblysynyń Hromtaý aýdandyq ortalyq aýrýhanasyna jetkizildi. Ekeýiniń jaǵdaiy aýyr, tórteýiniń jaǵdaiy ortasha aýyr dep baǵalanýda.
Premer-ministr Oljas Bektenovtiń tapsyrmasymen qaiǵyly jaǵdaidyń sebepterin anyqtaý úshin Úkimettik komissiia quryldy. Qaiǵyly jol apatyna qatysty tergeýdi Ishki ister ministri Erjan Sádenov jeke baqylaýyna aldy.
