پرەمەر- ءمينيستردىڭ ورىنباسارى قانات بوزىمبايەۆ اقتوبە وبلىسىنداعى بەلقوپا اۋىلىنا جاقىن ماڭدا بولعان جول- كولىك وقيعاسىنىڭ سەبەپتەرىن تەرگەۋ جونىندەگى ۇكىمەتتىك كوميسسيا مۇشەلەرىنە تاپسىرمالار بەردى دەپ حابارلايدى Dalanews.kz.ق ر ۇكىمەتىنىڭ باسپا ءسوز قىزمەتىنە سىلتەمە جاساپ.
اتاپ ايتقاندا، بوزىمبايەۆ دەنساۋلىق ساقتاۋ مينيسترلىگىنە تاسىمالداۋعا جاتاتىن بارلىق زارداپ شەككەندەردى قاجەتتى ەم الۋى ءۇشىن سانيتارلىق اۆياسيامەن استانا قالاسىنا جەتكىزۋدى ۇيىمداستىرۋدى تاپسىردى.
ەڭبەك مينيسترلىگى مەن اقتوبە وبلىسىنىڭ اكىمىنە قازا تاپقانداردىڭ وتباسىلارىنا بارلىق قاجەتتى ماتەريالدىق جانە پسيحولوگيالىق كومەك كورسەتۋدى تاپسىردى.
ىشكى ىستەر مينيسترلىگى مەن كولىك مينيسترلىگىنە ۆيسە-پرەمەر سامارا – شىمكەنت تراسساسىنىڭ قاۋىپسىزدىك دەڭگەيىن ارتتىرۋ ماقساتىندا ونىڭ جۇمىس تارتىبىنە قاتىستى ۇسىنىستار ەنگىزۋدى تاپسىردى.
ەسكە سالايىق، سۇمدىق جول اپاتى 23 قازان كۇنى تاڭەرتەڭ سامارا – شىمكەنت اۆتوجولىندا بولعان. جول-كولىك وقيعاسى كەزىندە DAF جۇك كولىگى مەن جولاۋشىلار مىنگەن «گازەل» سوقتىعىسقان. الدىن الا مالىمەتتەر بويىنشا، جۇك كولىگى قارسى باعىتقا شىعىپ كەتكەن. وقيعا ورنىندا ەكى جۇرگىزۋشى مەن ون جولاۋشى قازا تاپقان. قايتىس بولعانداردىڭ اراسىندا – اتا-اناسىمەن بىرگە ەكى بالا بار.
التى ادام اقتوبە وبلىسىنىڭ حرومتاۋ اۋداندىق ورتالىق اۋرۋحاناسىنا جەتكىزىلدى. ەكەۋىنىڭ جاعدايى اۋىر، تورتەۋىنىڭ جاعدايى ورتاشا اۋىر دەپ باعالانۋدا.
پرەمەر-مينيستر ولجاس بەكتەنوۆتىڭ تاپسىرماسىمەن قايعىلى جاعدايدىڭ سەبەپتەرىن انىقتاۋ ءۇشىن ۇكىمەتتىك كوميسسيا قۇرىلدى. قايعىلى جول اپاتىنا قاتىستى تەرگەۋدى ىشكى ىستەر ءمينيسترى ەرجان سادەنوۆ جەكە باقىلاۋىنا الدى.
