Zamanaýı úlgide jasaqtalǵan ortalyqta jedel járdem avtokólikteri shaqyrtýlarǵa der kezinde medısınalyq kómek kórsetý úshin defıbrıllátor, kardıostımýlátor, kardıoversıa, kardıomonıtor, elektrokardıograf, IVL apparattarymen, ottegimen jáne elektrlik, mehanıkalyq sorǵysh apparattarymen qamtylǵan. Jedel járdem stansıasy jylyna 70 000 - ǵa jýyq shaqyrýǵa shyǵa alady.
– Túrkistan oblysynda medısına salasynda istelip jatqan jumystar jetkilikti. Jańa nysandar salynyp, dárigerlerdiń biliktiligin arttyryp, sıfrlandyrý, jedel járdem kólikterimen qamtý jumystary óz retimen júrgizilip keledi. Bul, óz kezeginde, óńirimizdegi atalǵan salanyń odan ári damyp, órkendeýine jol ashady dep bilemin. Jańa jedel járdem stansıasyna ınvestısıa salǵan «Qazaqstandyq-Fransýzdyq «KATKO» birlesken kásipornyna» rızashylyǵymyzdy bildiremiz. Túrkistanda halyqaralyq standarttarǵa saı zamanaýı emdeý ortalyqtary jumys isteıtin bolady, – dedi Ómirzaq Shókeev.
Jedel járdem stansasy 4 kategorıalyq sanat boıynsha «altyn saǵat» qaǵıdasyna saı jumys isteıdi. Ortalyqta sondaı-aq AQSH-ta biliktiligin arttyrǵan oblys mamandary qyzmet kórsetedi. Jalpy oblys boıynsha 140 jedel medısınalyq járdem brıgadalary shaqyrtýlarǵa qyzmet atqarady. Óńir qajettiligi 96 paıyzǵa qamtylǵan. Oblysta jedel járdem qyzmetiniń klasteri qurylyp, aýyldyq jáne qalalyq jedel járdem qyzmetteri ortalyqtandyrylǵan. Nátıjesinde naýqastarǵa jetý ýaqyty barynsha azaıyp, qyzmet kórserý sapasy aıtarlyqtaı artty.
Túrkistan qalasynda medısına salasyn damytýǵa kúsh salynýda. Birikken Arab Ámirlikteriniń qoldaýymen «Ana men bala ortalyǵynyń» qurylysy júrip jatyr.
