زاماناۋي ۇلگىدە جاساقتالعان ورتالىقتا جەدەل جاردەم اۆتوكولىكتەرى شاقىرتۋلارعا دەر كەزىندە مەديسينالىق كومەك كورسەتۋ ءۇشىن دەفيبريللياتور، كارديوستيمۋلياتور، كارديوۆەرسيا، كارديومونيتور، ەلەكتروكارديوگراف، يۆل اپپاراتتارىمەن، وتتەگىمەن جانە ەلەكترلىك، مەحانيكالىق سورعىش اپپاراتتارىمەن قامتىلعان. جەدەل جاردەم ستانسياسى جىلىنا 70 000 - عا جۋىق شاقىرۋعا شىعا الادى.
– تۇركىستان وبلىسىندا مەديسينا سالاسىندا ىستەلىپ جاتقان جۇمىستار جەتكىلىكتى. جاڭا نىساندار سالىنىپ، دارىگەرلەردىڭ بىلىكتىلىگىن ارتتىرىپ، سيفرلاندىرۋ، جەدەل جاردەم كولىكتەرىمەن قامتۋ جۇمىستارى ءوز رەتىمەن جۇرگىزىلىپ كەلەدى. بۇل، ءوز كەزەگىندە، وڭىرىمىزدەگى اتالعان سالانىڭ ودان ءارى دامىپ، وركەندەۋىنە جول اشادى دەپ بىلەمىن. جاڭا جەدەل جاردەم ستانسياسىنا ينۆەستيسيا سالعان «قازاقستاندىق-فرانسۋزدىق «كاتكو» بىرلەسكەن كاسىپورنىنا» ريزاشىلىعىمىزدى بىلدىرەمىز. تۇركىستاندا حالىقارالىق ستاندارتتارعا ساي زاماناۋي ەمدەۋ ورتالىقتارى جۇمىس ىستەيتىن بولادى، – دەدى ءومىرزاق شوكەيەۆ.
جەدەل جاردەم ستانساسى 4 كاتەگوريالىق سانات بويىنشا «التىن ساعات» قاعيداسىنا ساي جۇمىس ىستەيدى. ورتالىقتا سونداي-اق اقش-تا بىلىكتىلىگىن ارتتىرعان وبلىس ماماندارى قىزمەت كورسەتەدى. جالپى وبلىس بويىنشا 140 جەدەل مەديسينالىق جاردەم بريگادالارى شاقىرتۋلارعا قىزمەت اتقارادى. ءوڭىر قاجەتتىلىگى 96 پايىزعا قامتىلعان. وبلىستا جەدەل جاردەم قىزمەتىنىڭ كلاستەرى قۇرىلىپ، اۋىلدىق جانە قالالىق جەدەل جاردەم قىزمەتتەرى ورتالىقتاندىرىلعان. ناتيجەسىندە ناۋقاستارعا جەتۋ ۋاقىتى بارىنشا ازايىپ، قىزمەت كورسەرۋ ساپاسى ايتارلىقتاي ارتتى.
تۇركىستان قالاسىندا مەديسينا سالاسىن دامىتۋعا كۇش سالىنۋدا. بىرىككەن اراب امىرلىكتەرىنىڭ قولداۋىمەن «انا مەن بالا ورتالىعىنىڭ» قۇرىلىسى ءجۇرىپ جاتىر.
