Treiding, qarjy salasyndaǵy sarapshy Dýman Erqanatty ginekolog áiel zorlady dep jala jaýyp, túrli saittar arqyly abyroiyn tógip, 100 million teńge bopsalaǵan. Qazirgi tańda barlyq derek, aiǵaqtar eskerilip, Almatynyń qalalyq soty Dýman Erqanatty aqtap shyqty. Kásipkerdiń ózi oqiǵa qalai bolǵanyn áńgimelep berdi, - dep habarlaidy Dalanews.kz.
Dýman AQSh-ta magistratýra baǵdarlamasy boiynsha bilim alyp, úsh jyl buryn Qazaqstanǵa oralǵan. Ol aiyna 5-6 million tabys tabatyn. Dýman - treider, birja salasynda jumys isteitin maman. Sondyqtan áleýmettik jelide kóp adam Dýmanǵa habarlasyp, keńes surap turatyn. Sondai oqyrmandarynyń biri "A" esimdi qyz bolǵan.
"Men mán bermedim basynda. Kóptegen adam jekeme jazyp, habarlasatyn. 2022 jyly jeltoqsanda keshki saǵat onnan asa úide kino kórip jatqanmyn. Ol qyz jekeme jazdy, ne istep jatqanymdy surady, men kino kórip jatqanymdy aittym. Ol birge kino kórýge kelisip, úiime keldi. Kútip aldym, úige keldik, áńgimelestik, ústinde brend kiimder, shamamen 30-daǵy qyz. Basymda jaman oi bolǵan joq. Kino kórdik, tanystyq, áńgimelestik.Sol kezde qyzdyń qalaýymen birge boldyq. Artynsha ol maǵan qarny ashqanyn aityp, onlain tamaqqa tapsyrys berdik. Sosyn túngi bir shamasynda ol kisini úiine shyǵaryp saldym. Eki saǵattan keiin "meni zorlady" dep jala jaýyp,qylmystyqis qozǵala bastady. Biraq eshqandai saraptama, dálel bolmaǵandyqtan, is sol jerde jabyldy. Shamamen eki aidan asa ýaqyttan keiin is qaitadan qozǵalyp, meni túrmege qamaýǵa aldy", - deidi kásipker Baýyrjan Bógenbaiǵa bergen suhbatynda.
Bul jaitqa qatysty zańger, Májilis depýtaty Abzal Quspan da pikir bildirdi.
"Dýman esimdi azamattyń isinde men ne kórip otyrmyn? Birinshi satydaǵy sot eshqandai dálel bolmasa da bes jylǵa sottap jiberedi. Biraq tańǵalǵanym Almaty qalasyndaǵy apelliatsiialyq sot alqasyndaǵy jan-jaqty otyryp jazǵany. 22.40-ta ol áiel ózi hat jazady, ózi suranyp úiine keledi. Habarlamalardyń ishinde mynaǵan nazar aýdarý kerek: "ne istep otyrsyń?" deidi, "kino qarap otyrmyn" deidi, "men de baryp birge qaraiyqshy" deidi. Ózi usynyp, ózi keledi, sosyn jańaǵy jaǵdai bolady. Bul jerde moraldyq jaǵdaidy qozǵamai-aq qoiaiyn, másele qylmys boldy ma, joq pa degende.
Eger áiel adamnyń erkinen tys jynystyq qatynasqa túsken bolsa,onda, sózsiz, ol - zorlaý. Kelisim bolsa eshqandai qylmys bolmaidy. Sot aktilerinde ózara kelisimmen bolǵany aidai anyq kórinip tur. Sondyqtan qaýlyny kórgen kezde qansha jyldan beri qalyptasqan sot tájiribesi shynymen durys jolǵan túseiin degen eken dep oiǵa qaldym", - deidi Abzal Quspan.
Kásipkerge jala japqan áiel suraǵan soma az emes - ol Dýman Erqanattan 100 million teńge talap etken. Eger osy somany berse bostandyqta qalatynyn, "aǵalary" arqyly úkimettik uiymdarǵa áser ete alatynyn aitqan.
"Týystarymnan, jaqyndarymnan jinap bere salsam da bolar edi. Advokattar da bere sal dedi. Biraq olai jasaǵym kelmedi. Otbasymnyń aldynda jasamaǵan nársem úshin qylmysker bolǵym kelmedi. Sol sebepti kúresýge sheshim qabyldadym", - deidi Dýman.
Sot protsesi tórt aiǵa jalǵasqan. Alaida sot barysynda Dýmannyń kinásiz ekeni dáleldene bastaǵan tusta "jábirlenýshi" áiel aiǵailap, shý shyǵaryp júrgen. Arasynda áiel adam aýyryp, sotqa kelmei júrgen tusynda Dýmannyń túrmede otyrýyna týra kelgen.
Alaida Almaty qalalyq soty barlyq dálel keltirilgennen keiin kásipkerdiń qylmys jasamaǵanyn aityp, Dýmandy aqtap shyqqan.
Abzal Quspan bul óte problemalyq is bolǵanyn aitady.
"Qazirgi sot tájiribesinde, ókinishke qarai, bir ǵana taraptyń jaýabymen ótip ketip jatyr. Almaty qalasynyń soty qabyldaǵan sheshim - erekshe jaǵdai. Amerikadaǵy tájiribeni alyp qarasaq, mundai problema ol jerde de bolǵan, áiel quqyǵyn qorǵaýshy azamattar tarapynan Rape kit degen "konteiner" qurylǵan. Iaǵni zorlyq qylmystary bolǵan jaǵdaida onyń dáleldemelerin birden jinaityn "konteiner" - dálelder jinaǵy. Bizdiń júiede ondai uǵym joq. Bizde aryz jazsa bári sottalyp ketedi degen oi bar. Ony keibir jábirlenýshiler de bilip alǵan", - deidi depýtat.
Zańger Qazaqstanda da Rape kit sekildi 1-2 saǵatta jasalatyn dálelder jinaǵyn jasaý keregin aitady. Bul er adamdardyń ǵana emes, jábirlenýshi áiel adamdardyń da quqyǵyn qorǵaidy.
Dýman Erqanattyń sózinshe, bir sátte áiel adam kommertsiialyq saittar arqyly qorqytýǵa kóshken. Birneshe buqaralyq aqparat quraly sot sheshimi shyqpai jatyp kásipker kináli ekenin aita bastaǵan.
"Dýmannyń qateligi nede? Ol osy jaǵdai bolyp jatqan kezde birden aryz jazýy kerek edi. Ol qorǵanýdyń passiv túrine emes, aktiv túrine kóshýi kerek edi", - deidi depýtat Abzal Quspan.
Sondyqtan zańger Abzal Quspan mundai jaǵdaida jalǵan aqparat berip, jala japqan tarap ta jazalanýy keregin aitady. Sebebi jala japqan adam jazalanbasa, ol kelesi joly da basqa azamatqa jala jaýyp, ol kinásiz ekenin dáleldei almaǵan jaǵdai sottalyp ketýi múmkin.
