ترەيدينگ، قارجى سالاسىنداعى ساراپشى دۋمان ەرقاناتتى گينەكولوگ ايەل زورلادى دەپ جالا جاۋىپ، ءتۇرلى سايتتار ارقىلى ابىرويىن توگىپ، 100 ميلليون تەڭگە بوپسالاعان. قازىرگى تاڭدا بارلىق دەرەك، ايعاقتار ەسكەرىلىپ، الماتىنىڭ قالالىق سوتى دۋمان ەرقاناتتى اقتاپ شىقتى. كاسىپكەردىڭ ءوزى وقيعا قالاي بولعانىن اڭگىمەلەپ بەردى، - دەپ حابارلايدى Dalanews.kz.
دۋمان اقش-تا ماگيستراتۋرا باعدارلاماسى بويىنشا ءبىلىم الىپ، ءۇش جىل بۇرىن قازاقستانعا ورالعان. ول ايىنا 5-6 ميلليون تابىس تاباتىن. دۋمان - ترەيدەر، بيرجا سالاسىندا جۇمىس ىستەيتىن مامان. سوندىقتان الەۋمەتتىك جەلىدە كوپ ادام دۋمانعا حابارلاسىپ، كەڭەس سۇراپ تۇراتىن. سونداي وقىرماندارىنىڭ ءبىرى "ا" ەسىمدى قىز بولعان.
"مەن ءمان بەرمەدىم باسىندا. كوپتەگەن ادام جەكەمە جازىپ، حابارلاساتىن. 2022 جىلى جەلتوقساندا كەشكى ساعات وننان اسا ۇيدە كينو كورىپ جاتقانمىن. ول قىز جەكەمە جازدى، نە ىستەپ جاتقانىمدى سۇرادى، مەن كينو كورىپ جاتقانىمدى ايتتىم. ول بىرگە كينو كورۋگە كەلىسىپ، ۇيىمە كەلدى. كۇتىپ الدىم، ۇيگە كەلدىك، اڭگىمەلەستىك، ۇستىندە برەند كيىمدەر، شامامەن 30-داعى قىز. باسىمدا جامان وي بولعان جوق. كينو كوردىك، تانىستىق، اڭگىمەلەستىك.سول كەزدە قىزدىڭ قالاۋىمەن بىرگە بولدىق. ارتىنشا ول ماعان قارنى اشقانىن ايتىپ، ونلاين تاماققا تاپسىرىس بەردىك. سوسىن تۇنگى ءبىر شاماسىندا ول كىسىنى ۇيىنە شىعارىپ سالدىم. ەكى ساعاتتان كەيىن "مەنى زورلادى" دەپ جالا جاۋىپ،ءقىلمىستىقىس قوزعالا باستادى. ءبىراق ەشقانداي ساراپتاما، دالەل بولماعاندىقتان، ءىس سول جەردە جابىلدى. شامامەن ەكى ايدان اسا ۋاقىتتان كەيىن ءىس قايتادان قوزعالىپ، مەنى تۇرمەگە قاماۋعا الدى"، - دەيدى كاسىپكەر باۋىرجان بوگەنبايعا بەرگەن سۇحباتىندا.
بۇل جايتقا قاتىستى زاڭگەر، ءماجىلىس دەپۋتاتى ابزال قۇسپان دا پىكىر ءبىلدىردى.
"دۋمان ەسىمدى ازاماتتىڭ ىسىندە مەن نە كورىپ وتىرمىن؟ ءبىرىنشى ساتىداعى سوت ەشقانداي دالەل بولماسا دا بەس جىلعا سوتتاپ جىبەرەدى. ءبىراق تاڭعالعانىم الماتى قالاسىنداعى اپەللياسيالىق سوت القاسىنداعى جان-جاقتى وتىرىپ جازعانى. 22.40-تا ول ايەل ءوزى حات جازادى، ءوزى سۇرانىپ ۇيىنە كەلەدى. حابارلامالاردىڭ ىشىندە مىناعان نازار اۋدارۋ كەرەك: "نە ىستەپ وتىرسىڭ؟" دەيدى، "كينو قاراپ وتىرمىن" دەيدى، "مەن دە بارىپ بىرگە قارايىقشى" دەيدى. ءوزى ۇسىنىپ، ءوزى كەلەدى، سوسىن جاڭاعى جاعداي بولادى. بۇل جەردە مورالدىق جاعدايدى قوزعاماي-اق قويايىن، ماسەلە قىلمىس بولدى ما، جوق پا دەگەندە.
ەگەر ايەل ادامنىڭ ەركىنەن تىس جىنىستىق قاتىناسقا تۇسكەن بولسا،وندا، ءسوزسىز، ول - زورلاۋ. كەلىسىم بولسا ەشقانداي قىلمىس بولمايدى. سوت اكتىلەرىندە ءوزارا كەلىسىممەن بولعانى ايداي انىق كورىنىپ تۇر. سوندىقتان قاۋلىنى كورگەن كەزدە قانشا جىلدان بەرى قالىپتاسقان سوت تاجىريبەسى شىنىمەن دۇرىس جولعان تۇسەيىن دەگەن ەكەن دەپ ويعا قالدىم"، - دەيدى ابزال قۇسپان.
كاسىپكەرگە جالا جاپقان ايەل سۇراعان سوما از ەمەس - ول دۋمان ەرقاناتتان 100 ميلليون تەڭگە تالاپ ەتكەن. ەگەر وسى سومانى بەرسە بوستاندىقتا قالاتىنىن، "اعالارى" ارقىلى ۇكىمەتتىك ۇيىمدارعا اسەر ەتە الاتىنىن ايتقان.
"تۋىستارىمنان، جاقىندارىمنان جيناپ بەرە سالسام دا بولار ەدى. ادۆوكاتتار دا بەرە سال دەدى. ءبىراق ولاي جاساعىم كەلمەدى. وتباسىمنىڭ الدىندا جاساماعان نارسەم ءۇشىن قىلمىسكەر بولعىم كەلمەدى. سول سەبەپتى كۇرەسۋگە شەشىم قابىلدادىم"، - دەيدى دۋمان.
سوت پروسەسى ءتورت ايعا جالعاسقان. الايدا سوت بارىسىندا دۋماننىڭ كىناسىز ەكەنى دالەلدەنە باستاعان تۇستا "جابىرلەنۋشى" ايەل ايعايلاپ، شۋ شىعارىپ جۇرگەن. اراسىندا ايەل ادام اۋىرىپ، سوتقا كەلمەي جۇرگەن تۇسىندا دۋماننىڭ تۇرمەدە وتىرۋىنا تۋرا كەلگەن.
الايدا الماتى قالالىق سوتى بارلىق دالەل كەلتىرىلگەننەن كەيىن كاسىپكەردىڭ قىلمىس جاساماعانىن ايتىپ، دۋماندى اقتاپ شىققان.
ابزال قۇسپان بۇل وتە پروبلەمالىق ءىس بولعانىن ايتادى.
"قازىرگى سوت تاجىريبەسىندە، وكىنىشكە قاراي، ءبىر عانا تاراپتىڭ جاۋابىمەن ءوتىپ كەتىپ جاتىر. الماتى قالاسىنىڭ سوتى قابىلداعان شەشىم - ەرەكشە جاعداي. امەريكاداعى تاجىريبەنى الىپ قاراساق، مۇنداي پروبلەما ول جەردە دە بولعان، ايەل قۇقىعىن قورعاۋشى ازاماتتار تاراپىنان Rape kit دەگەن "كونتەينەر" قۇرىلعان. ياعني زورلىق قىلمىستارى بولعان جاعدايدا ونىڭ دالەلدەمەلەرىن بىردەن جينايتىن "كونتەينەر" - دالەلدەر جيناعى. ءبىزدىڭ جۇيەدە ونداي ۇعىم جوق. بىزدە ارىز جازسا ءبارى سوتتالىپ كەتەدى دەگەن وي بار. ونى كەيبىر جابىرلەنۋشىلەر دە ءبىلىپ العان"، - دەيدى دەپۋتات.
زاڭگەر قازاقستاندا دا Rape kit سەكىلدى 1-2 ساعاتتا جاسالاتىن دالەلدەر جيناعىن جاساۋ كەرەگىن ايتادى. بۇل ەر ادامداردىڭ عانا ەمەس، جابىرلەنۋشى ايەل ادامداردىڭ دا قۇقىعىن قورعايدى.
دۋمان ەرقاناتتىڭ سوزىنشە، ءبىر ساتتە ايەل ادام كوممەرسيالىق سايتتار ارقىلى قورقىتۋعا كوشكەن. بىرنەشە بۇقارالىق اقپارات قۇرالى سوت شەشىمى شىقپاي جاتىپ كاسىپكەر كىنالى ەكەنىن ايتا باستاعان.
"دۋماننىڭ قاتەلىگى نەدە؟ ول وسى جاعداي بولىپ جاتقان كەزدە بىردەن ارىز جازۋى كەرەك ەدى. ول قورعانۋدىڭ پاسسيۆ تۇرىنە ەمەس، اكتيۆ تۇرىنە كوشۋى كەرەك ەدى"، - دەيدى دەپۋتات ابزال قۇسپان.
سوندىقتان زاڭگەر ابزال قۇسپان مۇنداي جاعدايدا جالعان اقپارات بەرىپ، جالا جاپقان تاراپ تا جازالانۋى كەرەگىن ايتادى. سەبەبى جالا جاپقان ادام جازالانباسا، ول كەلەسى جولى دا باسقا ازاماتقا جالا جاۋىپ، ول كىناسىز ەكەنىن دالەلدەي الماعان جاعداي سوتتالىپ كەتۋى مۇمكىن.
