2026 jylǵy 1 shildeden bastap Qazaqstanda ıpoteka berý talaptaryn ózgertý josparlanyp otyr. Negizgi jańashyldyqtardyń biri – birden eki shekti mólsherlemeniń engizilýi. Olar 20% jáne 25% deńgeıinde belgilenbek, dep habarlaıdy Dalanews.kz Krisha.kz-ke silteme jasap.
Budan bólek, bankter qaryz alýshylardyń tabysyn qatańyraq tekserip, jalpy boryshtyq júktemesin de esepke ala bastaıdy.
Ipoteka boıynsha eki mólsherleme engiziledi
Ulttyq bank pen Qarjy naryǵyn retteý jáne damytý agenttigi banktermen birlesip ıpoteka boıynsha jańa eń joǵary mólsherlemelerdi kelisken.
Olar bastapqy jarna kólemine baılanysty bolady.
Eger bastapqy jarna 30% nemese odan joǵary bolsa, ıpotekanyń jyldyq tıimdi syıaqy mólsherlemesi 20%-dan aspaıdy.
Al bastapqy jarna 30%-dan tómen bolsa, mólsherleme 25%-ǵa deıin jetýi múmkin.
Osylaısha, 1 shildeden bastap ıpoteka mólsherlemesi qaryz alýshynyń alǵashqy jarnaǵa qansha qarjy jınaǵanyna táýeldi bolady.
Iaǵnı bastapqy jarna neǵurlym kóp bolsa, ıpoteka soǵurlym arzan bolady. Al jınaq az bolsa, mólsherleme joǵarylaıdy.
Ulttyq bank tóraǵasy Tımýr Súleımenov bul sheshim banktermen kelisilgenin, alaıda áli tehnıkalyq daıyndyq jumystary júrgiziletinin aıtty. Tıisti buıryq jobasy mamyr aıynda jarıalanady dep josparlanyp otyr.
Ipoteka tek resmı tabysy barlarǵa beriledi
Taǵy bir mańyzdy ózgeris – bankter endi tek rastalǵan tabysty ǵana esepke alady.
Iaǵnı nazar myna kórsetkishterge aýdarylady:
– zeınetaqy aýdarymdaryna;
– resmı jalaqyǵa;
– qujatpen rastalǵan kiristerge.
Bul degenimiz, tabysyn dáleldeı almaǵan azamattarǵa ıpoteka alý qıyndaı túsedi.
Boryshtyq júktemege jańa koefısıent engiziledi
Qazir bankter ıpoteka maquldaǵanda barlyq nesıe tólemderi azamat tabysynyń 50%-ynan aspaýy tıis degen talapty qoldanady.
Shilde aıynan bastap taǵy bir kórsetkish qosý josparlanǵan. Ol – qaryzdyń tabysqa qatynasy koefısıenti.
Bul kórsetkish aı saıynǵy tólemdi ǵana emes, qaryz alýshynyń jalpy beresheginiń onyń jyldyq tabysyna shaqqandaǵy kólemin de kórsetedi.
Jospar boıynsha, bankter ıpoteka, avtonesıe jáne kepilsiz qaryzdar boıynsha bólek shekteýler engizedi. Munyń bári azamattyń tabysyna qaraı qansha qaryz ala alatynyn anyqtaıtyn ortaq koefısıent aıasynda jumys isteıdi.
Qarapaıym tilmen aıtqanda, aldymen adamnyń jalpy qaryz alý múmkindigi shekteledi, sodan keıin sol somanyń ıpotekaǵa, avtonesıege nemese basqa zaımdarǵa qanshasy bólinetini aıqyndalady.
Oqı otyryńyz: Almaty ma, álde Astana ma: sarapshy baspanany qaıdan satyp alǵan tıimdi ekenin aıtty
