2026 جىلعى 1 شىلدەدەن باستاپ قازاقستاندا يپوتەكا بەرۋ تالاپتارىن وزگەرتۋ جوسپارلانىپ وتىر. نەگىزگى جاڭاشىلدىقتاردىڭ ءبىرى – بىردەن ەكى شەكتى مولشەرلەمەنىڭ ەنگىزىلۋى. ولار 20% جانە 25% دەڭگەيىندە بەلگىلەنبەك، دەپ حابارلايدى Dalanews.kz Krisha.kz-كە سىلتەمە جاساپ. 

بۇدان بولەك، بانكتەر قارىز الۋشىلاردىڭ تابىسىن قاتاڭىراق تەكسەرىپ، جالپى بورىشتىق جۇكتەمەسىن دە ەسەپكە الا باستايدى.

يپوتەكا بويىنشا ەكى مولشەرلەمە ەنگىزىلەدى

ۇلتتىق بانك پەن قارجى نارىعىن رەتتەۋ جانە دامىتۋ اگەنتتىگى بانكتەرمەن بىرلەسىپ يپوتەكا بويىنشا جاڭا ەڭ جوعارى مولشەرلەمەلەردى كەلىسكەن.

ولار باستاپقى جارنا كولەمىنە بايلانىستى بولادى.

ەگەر باستاپقى جارنا 30% نەمەسە ودان جوعارى بولسا، يپوتەكانىڭ جىلدىق ءتيىمدى سىياقى مولشەرلەمەسى 20%-دان اسپايدى.

ال باستاپقى جارنا 30%-دان تومەن بولسا، مولشەرلەمە 25%-عا دەيىن جەتۋى مۇمكىن.

وسىلايشا، 1 شىلدەدەن باستاپ يپوتەكا مولشەرلەمەسى قارىز الۋشىنىڭ العاشقى جارناعا قانشا قارجى جيناعانىنا تاۋەلدى بولادى.

ياعني باستاپقى جارنا نەعۇرلىم كوپ بولسا، يپوتەكا سوعۇرلىم ارزان بولادى. ال جيناق از بولسا، مولشەرلەمە جوعارىلايدى.

ۇلتتىق بانك ءتوراعاسى تيمۋر سۇلەيمەنوۆ بۇل شەشىم بانكتەرمەن كەلىسىلگەنىن، الايدا ءالى تەحنيكالىق دايىندىق جۇمىستارى جۇرگىزىلەتىنىن ايتتى. ءتيىستى بۇيرىق جوباسى مامىر ايىندا جاريالانادى دەپ جوسپارلانىپ وتىر.

يپوتەكا تەك رەسمي تابىسى بارلارعا بەرىلەدى

تاعى ءبىر ماڭىزدى وزگەرىس – بانكتەر ەندى تەك راستالعان تابىستى عانا ەسەپكە الادى.

ياعني نازار مىنا كورسەتكىشتەرگە اۋدارىلادى:

– زەينەتاقى اۋدارىمدارىنا؛
– رەسمي جالاقىعا؛
– قۇجاتپەن راستالعان كىرىستەرگە.

بۇل دەگەنىمىز، تابىسىن دالەلدەي الماعان ازاماتتارعا يپوتەكا الۋ قيىنداي تۇسەدى.

بورىشتىق جۇكتەمەگە جاڭا كوەففيسيەنت ەنگىزىلەدى

ءقازىر بانكتەر يپوتەكا ماقۇلداعاندا بارلىق نەسيە تولەمدەرى ازامات تابىسىنىڭ 50%-ىنان اسپاۋى ءتيىس دەگەن تالاپتى قولدانادى.

شىلدە ايىنان باستاپ تاعى ءبىر كورسەتكىش قوسۋ جوسپارلانعان. ول – قارىزدىڭ تابىسقا قاتىناسى كوەففيسيەنتى.

بۇل كورسەتكىش اي سايىنعى تولەمدى عانا ەمەس، قارىز الۋشىنىڭ جالپى بەرەشەگىنىڭ ونىڭ جىلدىق تابىسىنا شاققانداعى كولەمىن دە كورسەتەدى.

جوسپار بويىنشا، بانكتەر يپوتەكا، اۆتونەسيە جانە كەپىلسىز قارىزدار بويىنشا بولەك شەكتەۋلەر ەنگىزەدى. مۇنىڭ ءبارى ازاماتتىڭ تابىسىنا قاراي قانشا قارىز الا الاتىنىن انىقتايتىن ورتاق كوەففيسيەنت اياسىندا جۇمىس ىستەيدى.

قاراپايىم تىلمەن ايتقاندا، الدىمەن ادامنىڭ جالپى قارىز الۋ مۇمكىندىگى شەكتەلەدى، سودان كەيىن سول سومانىڭ يپوتەكاعا، اۆتونەسيەگە نەمەسە باسقا زايمدارعا قانشاسى بولىنەتىنى ايقىندالادى.

وقي وتىرىڭىز: الماتى ما، الدە استانا ما: ساراپشى باسپانانى قايدان ساتىپ العان ءتيىمدى ەكەنىن ايتتى