Vitse-premer, mádeniet jáne aqparat ministri Aida Balaeva ult densaýlyǵy memlekettiń basty basymdyǵy ekenin atap ótip, mindetti áleýmettik jáne meditsinalyq saqtandyrý júiesiniń mańyzdylyǵyna toqtaldy, dep habarlaidy Dalanews.kz.
Ministrdiń aitýynsha, saqtandyrý – árbir azamattyń densaýlyǵyn qorǵaýdyń negizgi mehanizmi.
"Ult densaýlyǵy – memlekettiń basty basymdyǵy ári eldiń turaqty damýynyń negizi. Mindetti áleýmettik jáne meditsinalyq saqtandyrý – árbir azamattyń densaýlyǵyn qorǵaýǵa baǵyttalǵan basty qural. Bul júie meditsinalyq kómekti qoljetimdi, zamanaýi ári ádiletti etedi", - dedi Aida Balaeva.
Onyń sózinshe, 2026 jyly azamattyń saqtandyrylǵan mártebesi bolǵan jaǵdaida, meditsinalyq qyzmetterdiń keń aýqymyn mindetti saqtandyrý aiasynda josparly túrde alý múmkin bolady.
"Saqtandyrý júiesi otbasylardyń qarjylyq táýekelin azaitady, meditsinanyń turaqtylyǵyn kúsheitedi jáne memleketke densaýlyq saqtaý salasyn sapaly jańa deńgeide damytýǵa múmkindik beredi", - dedi ministr.
Aida Balaeva 2026 jyldyń 1 qańtarynan bastap mindetti áleýmettik meditsinalyq saqtandyrý júiesinde azamattardyń densaýlyǵyn nyǵaitýǵa jáne meditsinalyq kómektiń qoljetimdiligin arttyrýǵa baǵyttalǵan mańyzdy ózgerister kúshine enetinin de aitty.
Qazir mindetti saqtandyrý júiesinde shamamen 17 million adam tirkelgen. Bul el halqynyń 82 paiyzynan astamyn quraidy. Olardyń ishinde 12 millionnan asa adam jeńildik sanattaryna jatady. Al 4,5 million azamat jarnalardy ózderi tólep otyr.
"Bizdiń mindetimiz – saqtandyrylǵan azamattar qataryn keńeitý. Osy oraida júiege áli qosylmaǵan azamattardy mindetti meditsinalyq saqtandyrýdyń artyqshylyqtarymen muqiiat tanysýǵa shaqyramyn", - dep túiindedi ministr.
Meditsinalyq kómek týraly, sondai-aq MÁMS júiesindegi ózgerister boiynsha (emhana men aýrýhana deńgeiindegi meditsinalyq kómek, dispanserleý, dári-dármekpen qamtamasyz etý, gospitalizatsiialaý, meditsinalyq kómektiń sapasy, meditsinalyq personal tarapynan bolǵan buzýshylyqtar men shaǵymdar jáne t.b.) naqty ári tolyq aqparatty myna resmi arnalar arqyly alýǵa bolady:
