Qazaqstanda 1 mamyrdan bastap jedel járdem qyzmeti men emhanalar janyndaǵy mobildik brigadalardyń jumys tártibi ózgermek. Bul týraly Densaýlyq saqtaý ministrligi málimdedi, dep habarlaidy Dalanews.kz.
Azamattardyń 103 nómiri boiynsha jedel kómekke shaqyrtý quqyǵy saqtalady. Alaida jedeldiliktiń 4-sanatyna jatatyn, ómirge tikelei qaýip tóndirmeitin jaǵdailar boiynsha (mysaly, qan qysymynyń kóterilýi, dene qyzýy, jeńil jaraqattar) shaqyrtýlar endi kúndizgi ýaqytta emhanalar janyndaǵy alǵashqy meditsinalyq-sanitarlyq kómek (MSAK) mobildik brigadalaryna baǵyttalatyn bolady.
Ózgeristerdiń negizgi tustary:
• Mobildik brigadalar emhanalardyń janynda saǵat 8:00-den 20:00-ge deiin jumys isteidi;
• 4-sanattaǵy shaqyrtýlar jumys ýaqytynda emhanalar janyndaǵy MSAK brigadalaryna jiberiledi;
• 20:00-den keiin jáne demalys kúnderi barlyq shaqyrtýlarǵa, sonyń ishinde 4-sanatqa, burynǵydai jedel járdem qyzmet kórsetedi.
Vedomstvo bul ózgerister jedel járdem qyzmetiniń júktemesin azaityp, shyn máninde shuǵyl kómekke muqtaj adamdarǵa der kezinde jetýge múmkindik beredi dep túsindiredi.
Jańa ýaqyt standarttary:
• 1-sanat (asa shuǵyl jaǵdailar) – 10 minýt ishinde kelý;
• 2-sanat – 15 minýt ishinde;
• 3-sanat – 30 minýt ishinde;
• 4-sanat (ómirge qaýip joq) – mobildik brigada 60 minýt ishinde shaqyrtýǵa keledi.
Ministrlik bul qadam jedel járdemge júktemeni ońtailandyryp, meditsinalyq kómektiń sapasyn arttyrady dep sendiredi.
