Ulttyq bank basshysy Timýr Súleimenov búgin, 29 qarashada bazalyq syiaqy mólsherlemesi kólemin arttyrýǵa qatysty ótkizgen arnaiy baspasóz máslihatynda, kópti alańdatqan másele - aqsha baǵamyna qatysty da túsinikteme bere ketti. Eń bastysy, onyń aitýynsha, qymbat dollar azyq-túlik baǵamyna qatty áser etpeidi, dep habarlaidy Dalanews.kz.
28 qarashada birjadaǵy saýda-sattyq qorytyndysy boiynsha teńgege shaqqanda 1 AQSh dollarynyń baǵamy 512 teńge (+13 tg) deńgeiinde bekitildi. Jalpy, keshe atalǵan shetel valiýtasynyń baǵamy birjada 519,7 teńgege deiin jetti.
Timýr Súleimenov rezervtik valiýtalary bar damyǵan elderdiń valiýtalarynyń álsireýi baiqalatynyn, iaǵni dollar olarǵa qarsy nyǵaia túskenin aitady. Sondai-aq ol dollar baǵamynyń ósimin bizdiń ekonomikamyzdyń munai óndirisine kóbirek táýeldi bolýymen bailanystyrady.
"Mundai kezeńde jaǵdaidy turaqtandyrý, baǵamnyń kúrt ósimin tejeý jáne naryqty valiýtamen qamtamasyz etý úshin Ulttyq bank sońǵy kúnderi valiýtalyq interventsiialar júrgizdi. Qabyldanǵan sharalar aiyrbas baǵamynyń qandai da bir turaqsyz aýytqýlarǵa jol bermeýge múmkindik berdi jáne naryqtaǵy ahýaldyń turaqtanýyna yqpal etti", - dedi Ulttyq bank basshysy.
Qazirgi ýaqytta AQSh dollary KASE-de 507 teńge kóleminde saýdalanyp jatyr.
Sondai-aq Ulttyq bank basshysy teńgeniń álsireýi 2%-ti ǵana qamtitynyn, al bul azyq-túlik baǵasy ósimine qatty áser etpeitinin de naqtylaidy.
"Qazaqstan ekonomikasy baiaýlaǵan joq. Qysqa merzimdi ekonomikalyq indikator 10 aida 5,3% qurady", degen ol aldaǵy dollar baǵamyna qatysty boljammen bólisýden úzildi-kesildi bas tartty.
"Men taǵy da basa atap ótkim keledi, 500 degenge jabysyp alýdyń keregi joq. Kýrs - 498, bálkim, shartty túrde 495, shamamen úsh apta osylai turdy. Al ol qazir 507-ge teń dep eseptelik! 497, 498 jáne 507 - aiyrma 10 teńge, 500 teńgeniń 10 teńgesi - 2%", - dedi ol.
Onyń aitýynsha, 500 - psihologiialyq kórsetkish, biraq matematik, ekonomist, tipti kásipkerdiń kózqarasymen alyp qarasańyz, ózgerister 2%-ti quraidy.
"Import taýarlar baǵamynda ózgeris bolary sózsiz, al munyń azyq-túlik taýarlaryna qatysy bolmaidy dep sanaimyn. AShM ózge naryqtarmen,fermerlermen birlesip, otandyq taýarlardyń úlken usynysyn qalyptastyra bildi. Sondyqtan týra osy arasynda baǵaǵa qatysty qatty ózgeris bolmaidy dep oilaimyn", - dedi ol.
Keshe Almatyda aqsha aiyrbas oryndarynda 1 AQSh dollary 526 teńgeden satylyp, Ulttyq bank málimdeme jasaýǵa májbúr boldy. Olar qor birjasynda valiýtalyq interventsiia júrgizgenderin moiyndady.
