Алматыда есірткі тасымалының халықаралық арналарына қарсы операция басталды, деп хабарлайды dalanews.kz.
Ұжымдық қауіпсіздік туралы шарт ұйымының "Канал" өңірлік есірткіге қарсы операциясы аясында "Канал – Каспий шамшырағы" субөңірлік операциясы басталды.
Операцияға Қазақстан Республикасы, Беларусь Республикасы, Қырғыз Республикасы, Ресей Федерациясы және Тәжікстан Республикасы құзыретті органдарының уәкілетті өкілдері қатысады.
"Операцияның негізгі мақсаты – есірткінің заңсыз айналымын анықтау және олардың жолын кесу, есірткінің мемлекеттік шекаралар арқылы тасымалдануына жол бермеу, сондай-ақ, есірткі бизнесіне қатысы бар ұйымдасқан қылмыстық топтардың қызметіне қарсы іс-қимыл жасау", - деді ІІМ өкілдері.
Операция аясында көлік инфрақұрылымы нысандарында, соның ішінде әуежайларда, теңіз және өзен порттарында, теміржол тораптары мен станцияларында іздестіру, бақылау-тексеру және жедел-профилактикалық іс-шаралар өткізу көзделген.
Жүк пен багажда, жүк жөнелтілімдерінде және халықаралық пошта жөнелтілімдерінде тыйым салынған заттарды анықтауға ерекше назар аударылады.
