Alatau City Authority, AST Holdings Co., Ltd. және ILJOO GnS Co., Ltd. Smart City және Digital Twin саласындағы ынтымақтастық туралы үшжақты меморандумға қол қойды. Келесі практикалық кезең – Alatau City-де цифрлық егіз және заттар интернеті (IoT) технологияларын қолдану жөніндегі пилоттық жобаны пысықтау, деп хабарлайды dalanews.kz.
«Alatau City Authority» арнаулы басқару ұйымы, оңтүстіккореялық технологиялық компаниялар AST Holdings Co., Ltd. және ILJOO GnS Co., Ltd. Smart City және цифрлық технологиялар саласындағы ынтымақтастық туралы үшжақты меморандумға қол қойды.
Құжат Alatau City аумағында цифрлық егіз (Digital Twin) және заттар интернеті (IoT) технологияларын қолдану бойынша бірлескен пилоттық жобаны (Proof of Concept, PoC) іске қосуды көздейді.
Қол қою рәсімі Пусанда Global Smart City Expo халықаралық көрмесі аясында өтті және жаңа қаланы құруға әлемнің жетекші құзыреттерін тарту жолындағы практикалық қадам болды.
Alatau City Қазақстанның урбанизация мен іскерлік белсенділіктің жаңа ауқымды орталығы ретінде дамып келеді. Жобаның негізгі артықшылығы – физикалық құрылыс салумен қатар, жасанды интеллект құралдарын, деректерді жинауды және заттар интернетін (IoT) қалалық кеңістікке нөлден кіріктіре отырып, бірыңғай цифрлық инфрақұрылымды басынан қалау мүмкіндігі.
Меморандум аясында тараптар бірден қымбатқа түсетін толыққанды ендірулерге көшпей, технологияларды практикалық сынақтан өткізеді. Пилоттық жоба қалалық деректерді жинау мен синхрондауды, инженерлік жүйелердің мониторингін тексеруге мүмкіндік береді. Болашақта цифрлық модель қала құрылысында, көлік логистикасында, коммуналдық желілер мониторингінде және экологиялық қауіпсіздік саласында басқарушылық шешімдер қабылдаудың қолданбалы құралына айналады.
«Біздің міндетіміз – қала салынып біткенше күтіп, содан кейін ғана оның күрделі цифрлық трансформациясын бастау емес. Alatau City-дің қажетті IT-архитектураны дәл іргетастан қалыптастыруға бірегей мүмкіндігі бар. Біз цифрлық егізді жай презентациялық 3D-модель емес, нақты деректер негізінде қаланың дамуын басқаруға арналған жұмыс істейтін аналитикалық жүйе ретінде қарастырамыз. Сондықтан біз әр шешімнің тиімділігін оны ауқымдаудан бұрын практикада бағалау үшін танылған кореялық сарапшылармен пилоттан бастаймыз», – деп атап өтті Alatau City Authority-дің бас атқарушы директоры (CEO) Әлішер Әбдіқадыров.
Alatau City Authority әріптестерінің расталған халықаралық тәжірибесі бар:
AST Holdings Co., Ltd. – Smart City, GIS, BIM және Digital Twin технологияларына маманданған оңтүстіккореялық компания: Оңтүстік Кореяда, Сауд Арабиясында және басқа елдерде ауқымды жобаларды іске асыру тәжірибесі бар.
ILJOO GnS Co., Ltd. – өнеркәсіптік цифрландыру, жасанды интеллект және маңызды инфрақұрылымның қауіпсіздігі саласындағы шешімдерді әзірлеуші компания.
Кореялық әріптестермен ынтымақтастық бірлесіп тестілеу және технологиялардың өзара трансфері қағидатына негізделген. Қол қойылғаннан кейін сарапшы топтар пилоттық аймақтың параметрлерін келісуге кіріседі. PoC қорытындысы бойынша Alatau City цифрлық егізі экожүйесінің функционалын кеңейту мәселесі қаралатын болады.
