АҚШ президенті Дональд Трамп НАТО ұйымын сынға алды. Бұл туралы ол альянстың бас хатшысы Марк Рюттемен кездесуден кейін мәлімдеді, деп хабарлайды Dalanews.kz.
Трамп Вашингтонға қажет кезде НАТО АҚШ-қа көмекке келмейді деген сенім білдірді. Оның айтуынша, альянс бұрын да АҚШ үшін маңызды сәтте қолдау көрсетпеген.
Трамп Truth Social әлеуметтік желісінде:
«НАТО бізге қажет кезде жанымыздан табылған жоқ және қайтадан керек болса да табылмайды. Гренландияны еске түсіріңіздер, бұл үлкен, дұрыс басқарылмай отырған мұзды аумақ», – деп жазды.
Өз кезегінде Марк Рютте кездесуден кейінгі мәлімдемесінде америкалық тараптың одақтастарына көңілі толмай отырғанын жеткізді. Ол сондай-ақ НАТО-ның АҚШ үшін маңызды сынақтан өте алмағанын мойындады.
Рюттенің айтуынша, альянс АҚШ-тың Иранмен текетіресіне қосылудан бас тартып, осылайша Трамптың сенімін ақтай алмаған.
Еске салайық, бұған дейін АҚШ президенті Дональд Трамп НАТО-дан шығу мүмкіндігін қарастырып жатқанын мәлімдеген болатын.
