АҚШ президенті Дональд Трамп НАТО-дан шығу мүмкіндігін қарастырып жатқанын мәлімдеді, деп хабарлайды Dala News.
Оның айтуынша, альянс АҚШ-ты қолдамады және Иранға қарсы операция кезінде серіктестер әрекетсіз қалған.
«НАТО мені ешқашан таңғалдырған емес. Мен оны әрқашан қағаз жолбарыс деп санадым. Путин де мұны біледі», – деді Трамп.
Президент әсіресе Ормуз бұғазындағы жағдайға байланысты одақтастардың көмектеспегенін сынға алды. Оның пікірінше, АҚШ-қа қолдау «автоматты түрде» көрсетілуі тиіс еді.
Трамп Украинаға да қатысты пікір білдіріп, оны бұл жағдайда көмек көрсетпеді деп айыптады.
Сонымен қатар, АҚШ мемлекеттік хатшысы Марко Рубио да Вашингтон НАТО-мен қарым-қатынасты қайта қарауы мүмкін екенін айтты. Оның сөзінше, егер альянс тек Еуропаны қорғаумен шектелсе, мұндай серіктестіктің мәні төмендейді.
Ал Ұлыбритания премьер-министрі Кир Стармер өз кезегінде елдің ұлттық мүддесіне сай әрекет ететінін және еуропалық одақтастармен ынтымақтастықты жалғастыратынын мәлімдеді.
