Кәсіпкердің айтуынша бұл Жолдаудың кемшілігі көп, дегенмен тырнақ астынан кір іздеп, көпе-көрнеу айыптау да артық.
"Сондықтан негативке салынбаймын. Сырттай өз реакциямды объективті түрде айтуға тырысайын", – деген Марғұлан Сейсембай Жолдаудағы 5 маңызды бағытқа тоқталыпты.
"Менің ойымша, жолдауда ерекше атап өтуге тұратын және саяси тезистерге қатысты бес мәселе бар:
1. Әлемдік тәжірибе көрсетіп отырғандай, бұзып-жарғыш саяси либерализация тұрақсыздыққа әкеп соғады. Сондықтан біз саяси реформаларды алға аттандаумен емес, ойластырып отырып жүргіземіз.
Бұған келісермін. Бірақ бұл онсыз да жоғалтып алған қаншама уақытымызды тағы да өткізу болмаса игі еді.
2. «Біздің принципіміз – саяси модернизациясыз экономикалық реформаларды жүргізу мүмкін емес», – деді Президент.
Міне, бұған 100% келісемін! Тіпті 100500%!
3. «Заңда белгіленген тәртіпке сай, оларға (митинг) өткізуге рұқсат беру, ол үшін арнайы орын белгілеу. Алайда, ол қала сыртында болмауы керек», – деді.
Тұтастай алғанда, ілгерілеу байқалады. Бірақ, меніңше, митингілер ескертуші сипатта өтуі керек. Сондай-ақ, митингіні ұйымдастырушылар өз қауіпсіздігі үшін алаңдайтын болса, оны хабарлауы тиіс.
4. "Полицияның мемлекеттің күш құралы ретіндегі бейнесі біртіндеп келмеске кетеді. Ол азаматтардың қауіпсіздігін қамтамасыз ету үшін қызмет көрсететін органға айналады».
Міне, тағы да 100500% келісемін!
Мен тек «біртіндеп» деген сөздің күнтізбеге қойылғанын және нақты мерзімін естігім келеді.
5. «Алдағы мәжіліс пен мәслихат сайлауы еліміздегі көппартиялы жүйенің одан әрі дамуына сеп болуы керек».
Не бұл? Жаңа партияны тіркеуді жеңілдету жөніндегі уәдесі ме, әлде тек сайлау сеп болуға «тиіс» деген тілегі ғана ма?
Өз басым бұл сөзді түсінбедім", – дейді кәсіпкер.
Оның ойынша бұл жолғы Жолдау биліктің әлеуметтік желідегі наразылыққа құлақ түре бастағанынын көрінісі болды.
"Тоқаев жұрттың әлеуметтік желідегі реакциясына осы Жолдау арқылы жауап берді әрі өміріміздегі келеңсіз көріністерді реттеуге уәде берді. Мұның өзі жаман емес", – дейді Марғұлан Сейсембай.
