Қазақстан президенті Қасым-Жомарт Тоқаев Ресейдің Ленинград облысының губернаторы Александр Дрозденкомен өнеркәсіп, атом энергетикасы, көлік және агроөнеркәсіп кешені салаларындағы ынтымақтастықты талқылады, деп хабарлайды dalanews.kz.
Кездесу барысында Қазақстан мен Ресейдің стратегиялық серіктестігін нығайтудағы өңіраралық ықпалдастықтың маңызы атап өтілді. Мемлекет басшысы Ленинград облысының өнеркәсіптік және көлік-логистикалық әлеуетіне тоқталып, Қазақстанның өңірмен өзара тиімді ынтымақтастықты кеңейтуге дайын екенін растады.
Тоқаевтың айтуынша, екіжақты сауда-экономикалық байланыстар қарқынды дамып келеді. Өткен жылы Қазақстан мен Ленинград облысы арасындағы тауар айналымы 400 миллион доллардан асқан.
Александр Дрозденко қабылдағаны үшін Қазақстан президентіне алғыс айтып, Ресей президенті Владимир Путиннің сәлемін жеткізді. Сондай-ақ ол Ұлы Отан соғысы жылдарында Ленинград үшін шайқасқан қазақстандықтардың ерлігіне тоқталып, олардың есімі мен ерлігі туралы естелік сақталатынын атап өтті.
Кездесу барысында өнеркәсіп, атом энергетикасы, көлік және агроөнеркәсіп кешені салаларында бірлескен жобаларды жүзеге асыру мүмкіндіктері қарастырылды. Сонымен қатар мәдени-гуманитарлық байланыстарды тереңдету мәселелері талқыланды.
