Теміртауда Металлургтер даңғылындағы жол жөндеу жұмыстары жүріп жатқан аумақта бала су толған қазаншұңқырға құлап кетті. Оқиға Металлургтер даңғылы мен Амангелді көшесінің қиылысында болған, деп хабарлайды dalanews.kz.
Куәгерлердің айтуынша, бала ата-анасымен бірге жүрген. Олардың сөзінше, жөндеу жүргізіліп жатқан аумақ жеткілікті жарықтандырылмаған әрі қауіпсіздік қоршаулары талапқа сай орнатылмаған.
Теміртау қаласының тұрғын үй-коммуналдық шаруашылық бөлімі баланың ауруханаға жеткізілгенін хабарлады. Қазіргі таңда оның жағдайы тұрақты деп бағалануда.
Оқиғадан кейін мердігер ұйымға құрылыс алаңындағы қоршауларды күшейтіп, қауіпсіздік шараларын қатаңдату тапсырылды. Сондай-ақ мұндай жағдайдың қайталанбауы үшін қосымша қауіпсіздік талаптарын енгізу міндеттелді.
