Шымкентте Instagram желісінде шамамен 150 мың оқырманы бар жергілікті блогер мен оның үш сыбайласы ақша бопсалады деген күдікпен ұсталды, деп хабарлайды dalanews.kz.
Тергеу мәліметінше, күдіктілер кәсіпкерлер мен мемлекеттік қызметкерлерді бейнежазбаға түсірген. Бұған олардың қызметтік міндеттерін орындау барысында тәртіптік құқықбұзушылықтарға жол бергені немесе кәсіпкерлік қызметіне қатысты заңбұзушылықтар болуы мүмкін деген күдік себеп болған.
Полицияның мәліметінше, блогер түсірілген бейнематериалдарды қысым көрсету құралы ретінде пайдаланып, оларды әлеуметтік желілерде жарияламау үшін азаматтардан ақша талап еткен.
Күдіктілер ұсталып, қамауға алынды. Қазіргі уақытта қылмыстық іс бойынша тергеу амалдары жүргізіліп жатыр.
Бұған дейін журналист Михаил Козачков ұсталған адамның Шымкенттегі жергілікті блогер Асқат Балқыбаев (ASKO) екенін хабарлаған. Алайда құқық қорғау органдары әзірге күдіктінің жеке басын ресми түрде растаған жоқ.
