Халықаралық жастар күні Шығыс Қазақстан облысының әкімі Нұрымбет Сақтағанов Жамбыл Жабаев атындағы саябақта өңір жастарымен кездесті. Қатысушылар спорт, волонтерлік, экология, технология, мәдениет, кітап оқу және облыста жүзеге асырғысы келетін жобалар туралы әңгімелесті, деп хабарлайды dalanews.kz.
Кездесуге түрлі саланың 30 өкілі шақырылды. Жастар ұйымдары атынан облыстық Жастар ресурстық орталығының директоры Айдос Әділбеков, Қазақстан Республикасы Президенті жанындағы Жастар саясаты жөніндегі кеңестің мүшесі әрі «Ұлағат» жастар қоғамдық бірлестігінің төрағасы Бақытжан Ербол, сондай-ақ «Казцинк» ЖШС жанындағы Жұмысшы жастар кеңесінің жетекшісі Жансая Жанболатова қатысты.
Диалогқа «Дарын» мемлекеттік жастар сыйлығының лауреаты Меруерт Утегенова, жас кәсіпкер Сабина Мэльс, Oskemen Hub менеджері Мадияр Молдаканов, Shygys Creative Hub бөлімінің басшысы Рахат Сарсембеков және «Тәуелсіздік ұрпақтары» грантының жеңімпазы Дастан Буйткенов те қатысты.
Спорт саласын жеңіл атлетикадан U23 жастар арасындағы Қазақстан чемпионатының қола жүлдегері Жасмин Бегалинова, «Сардар» жекпе-жек мектебінің негізін қалаушы әрі аға жаттықтырушысы Ерзат Сакабанов және «Berel» волейбол клубының баспасөз хатшысы Ислам Мухамедуалиев таныстырды.
Қатысушылар арасында музыкант әрі жеке тректердің авторы Радмир Турсунбеков, суретші және мүсінші Кристина Зворыгина, «Оқырман» әдеби-жастар клубының төрағасы Расул Идиятов және Оралхан Бөкей атындағы Орталық қалалық кітапхананың мәдени-білім беру бағдарламалары бөлімінің меңгерушісі Руслан Бабиров болды.
Кездесуде волонтерлік қозғалысқа жеке бөлім арналды. Оған облыстық волонтерлер фронт-офисінің жетекшісі Анель Шарипжанова, «Өскемен Асар» жобасының жетекшісі әрі автоволонтерлер қозғалысының өкілі Татьяна Дементьева, «Жыл волонтері» номинациясының жеңімпазы Арна Арданбекқызы және облыстық фронт-офистің волонтері Назым Арынгазинова қатысты. Экологиялық бағытты «Чистые игры» жобасының ұйымдастырушысы Анастасия Черномаз таныстырды.
Нұрымбет Сақтағанов қатысушыларды Халықаралық жастар күнімен құттықтап, елдің одан әрі даму бағытын айқындайтын дәл осы жас ұрпақ екенін атап өтті. Оның айтуынша, Қазақстанның болашағы бүгінгі жастардың біліміне, мінезі мен жеке қасиеттеріне байланысты. Өңір басшысы Президенттің жастарды дамыту мен қолдауға ерекше көңіл бөлетінін де айтты.
Әкім кездесудің басында-ақ шенеуніктер атқарылған жұмыстар туралы баяндайтын, ал қатысушылар тек тыңдап отыратын қалыпты форматтан бас тартуды ұсынды.
– Бүгін атқарылған жұмыс туралы кезекті есеп емес, ашық әрі әділ диалог болғанын қалаймын, – деді Нұрымбет Сақтағанов.
Ол жастарды жоспарлары, жүзеге асырып жүрген жобалары мен кездесетін мәселелері туралы ашық айтуға шақырды. Өңір басшысының сөзінше, қай бағдарламалардың тиімсіз жұмыс істеп жатқанын, нені өзгерту қажет екенін және қандай бағыттарға қосымша қолдау керектігін анықтау маңызды.
– Сіздердің немен тыныстап жүргендеріңізді, бойларыңыздан қандай қуат сезілетінін, қандай жоспарларыңыз бар екенін естіп, мұқият тыңдағым келеді, – деді әкім.
Кездесудегі негізгі тақырыптардың бірі спорт болды. Қатысушылар жастардың Өскеменнің спорттық және қоғамдық өміріне қосып жүрген үлесі, салауатты өмір салтын насихаттау және жарыстардың маңызы туралы айтты. Олардың пікірінше, спорт адамға медаль мен жақсы дене дайындығынан әлдеқайда көп нәрсе береді. Ол тәртіпке, өзіңмен жұмыс істеуге, жеңілісті қабылдап, қайта тұрып, алға қойған мақсатқа қарай жүруге үйретеді. Сондай-ақ тек дене күшін емес, рухтың беріктігін де дамыту қажеттігі айтылды. Мұндай қасиеттер жеке жетістікке жету үшін де, елдің дамуы үшін де қажет.
Әңгімеде волонтерлік пен қоғамдық белсенділікке де көп көңіл бөлінді. Қатысушылар облыстық волонтерлер фронт-офисінің жұмысы, қалалық, облыстық және республикалық акциялардың маңызы туралы баяндады. Мұндай қызмет жастарға мәселені біреу келіп шешкенше күтіп отырмай, қоғамдық жұмысқа өздері араласып, адамдарға көмектесуге мүмкіндік береді.
Экологиялық жобалар да талқыланды. Қатысушылар мысал ретінде жартастарды вандалдық жазулардан тазарту акцияларын атады. Мұндай бастамалар табиғи нысандарды сақтауға көмектеседі әрі тасқа атын жазып қалдырғысы келетіндерге қолындағы бояу баллоны ешкімді әлі суретші етпегенін еске салады.
Стартаптар, цифрлық технологиялар және жасанды интеллект тағы бір маңызды бағытқа айналды. Жастар Шығыс Қазақстандағы технологиялық саланы дамыту, жаңа жобаларды қолдау және өз бастамасын іске қосуға дайын адамдарға жағдай жасау мәселелерін көтерді. Қатысушылардың пікірінше, өңір цифрлық өзгерістерді сырттай бақылап қана отырмай, мамандар даярлап, өзінің технологиялық шешімдерін дамытуы керек.
Әңгіме шығармашылық пен мәдениетті де қамтыды. Қатысушылар музыканттар, суретшілер, мүсіншілер және креативті саланың өзге өкілдері үшін жасалатын мүмкіндіктерді талқылады. Қазақстандық фольклорға негізделген жобаларға, сондай-ақ жас өнерпаздардың Шығыс Қазақстанды таныстыра алатын іс-шараларға қатысуына ерекше назар аударылды.
Кітап пен білім мәселесі де назардан тыс қалмады. Жастар балалардың кітап оқуға қызығушылығын арттыру, білім беру шеберлік сабақтарын өткізу және шығармашылықпен айналысатын алаңдар ашу қажеттігін айтты. Қатысушылардың пікірінше, әдебиетке, жазуға және өз бетінше ойлауға деген сүйіспеншілікті бала кезден қалыптастыру маңызды.
– Сондықтан бүгін өзім аз сөйлеп, сіздерді көбірек әрі мұқият тыңдағым келеді, – деді Нұрымбет Сақтағанов.
Әңгіме жалпы ұсыныстармен ғана шектелген жоқ. Бірқатар бастама бойынша әкім жауапты мемлекеттік органдар мен облыстық басқармаларға бірден тапсырма берді. Енді олар айтылған идеяларды зерделеп, көтерілген мәселелерді пысықтауы тиіс.
Бейресми кездесуге ауа райы да тосыннан араласты. Бір мезетте жаңбыр басталып, әңгіме үзіле жаздады. Алайда Нұрымбет Сақтағанов жастармен сұхбатты ағаштардың астында жалғастырды.
Кездесу соңында жастарға Абайдың кітаптары табысталды. Бұл сыйлық басқосуда көтерілген бірнеше тақырыпты бір арнаға тоғыстырды. Олар – кітап оқу, мәдениет, білім, өзін-өзі дамыту және берік мінез қалыптастыру.
