Алматы облысындағы Шарын ұлттық паркінде сирек кездесетін әрі қызыл кітапқа енген қарақұйрықты заңсыз аулаған браконьерлер ұсталды, деп хабарлайды Dalanews.kz.   

Тексеру кезінде олардың көлігінен жануардың өлексесі мен атыс қаруы табылған. Қазір аталған дерек бойынша қылмыстық іс қозғалып, тергеу жүргізілуде.

Оқиға 1 тамыз күні ұлттық парктің аумағында жүргізілген рейд барысында анықталған. Қорықшылар күдік тудырған автокөлікті тексеру кезінде багаж бөлігінен оққа ұшқан жануардың денесін тапқан.

Алдын ала болжам бойынша, ол Қазақстанның қызыл кітабына енгізілген қарақұйрық (Gazella subgutturosa) болуы мүмкін. Көлік ішінен 12-калибрлі мылтық та тәркіленген.

Ұлттық парк қызметкерлерінің шақыруымен оқиға орнына полиция келіп жетті.

Алматы облыстық Полиция департаменті күдіктілерге қатысты ҚР Қылмыстық кодексінің 337-бабы («Заңсыз аңшылық») бойынша іс қозғалғанын мәлімдеді. Қазіргі таңда оқиғаның жай-жапсары анықталуда, сараптама жұмыстары жүргізіліп жатыр.

Контекст ретінде айта кетсек, қарақұйрық Қазақстанның «Қызыл кітабына» алғаш рет 1978 жылы енгізілген. Бұл жануардың саны соңғы онжылдықтарда браконьерлік пен тіршілік ету ортасының тарылуына байланысты күрт азайған.

Сондықтан оған заң бойынша ерекше қорғау шаралары қолданылып, аңшылық жасауға қатаң тыйым салынған.