الماتى وبلىسىنداعى شارىن ۇلتتىق پاركىندە سيرەك كەزدەسەتىن ءارى قىزىل كىتاپقا ەنگەن قاراقۇيرىقتى زاڭسىز اۋلاعان براكونەرلەر ۇستالدى، دەپ حابارلايدى Dalanews.kz.   

تەكسەرۋ كەزىندە ولاردىڭ كولىگىنەن جانۋاردىڭ ولەكسەسى مەن اتىس قارۋى تابىلعان. ءقازىر اتالعان دەرەك بويىنشا قىلمىستىق ءىس قوزعالىپ، تەرگەۋ جۇرگىزىلۋدە.

وقيعا 1 تامىز كۇنى ۇلتتىق پاركتىڭ اۋماعىندا جۇرگىزىلگەن رەيد بارىسىندا انىقتالعان. قورىقشىلار كۇدىك تۋدىرعان اۆتوكولىكتى تەكسەرۋ كەزىندە باگاج بولىگىنەن وققا ۇشقان جانۋاردىڭ دەنەسىن تاپقان.

الدىن الا بولجام بويىنشا، ول قازاقستاننىڭ قىزىل كىتابىنا ەنگىزىلگەن قاراقۇيرىق (Gazella subgutturosa) بولۋى مۇمكىن. كولىك ىشىنەن 12-كاليبرلى مىلتىق تا تاركىلەنگەن.

ۇلتتىق پارك قىزمەتكەرلەرىنىڭ شاقىرۋىمەن وقيعا ورنىنا پوليسيا كەلىپ جەتتى.

الماتى وبلىستىق پوليسيا دەپارتامەنتى كۇدىكتىلەرگە قاتىستى ق ر قىلمىستىق كودەكسىنىڭ 337-بابى («زاڭسىز اڭشىلىق») بويىنشا ءىس قوزعالعانىن مالىمدەدى. قازىرگى تاڭدا وقيعانىڭ جاي-جاپسارى انىقتالۋدا، ساراپتاما جۇمىستارى جۇرگىزىلىپ جاتىر.

كونتەكست رەتىندە ايتا كەتسەك، قاراقۇيرىق قازاقستاننىڭ «قىزىل كىتابىنا» العاش رەت 1978 جىلى ەنگىزىلگەن. بۇل جانۋاردىڭ سانى سوڭعى ونجىلدىقتاردا براكونەرلىك پەن تىرشىلىك ەتۋ ورتاسىنىڭ تارىلۋىنا بايلانىستى كۇرت ازايعان.

سوندىقتان وعان زاڭ بويىنشا ەرەكشە قورعاۋ شارالارى قولدانىلىپ، اڭشىلىق جاساۋعا قاتاڭ تىيىم سالىنعان.